اسلام آباد ۔ 3 اپریل (اے پی پی) وزیر اعظم شاہد خاقان عباسی پاور ڈویژن کوں ایں امر کوں یقینی بنڑاونڑ دی ہدایت کیتی اے جو موجودہ بجلی گھراں دے سارے یونٹس فعال رہن تے رمضان المبارک اچ سحر و افطار دے دوران بجلی دی فراہمی اچ تعطل پیدا نہ تھیوے ۔انہاں اے گال کابینہ کمیٹی برائے توانائی دے اجلاس دی صدارت کریندے ہوئیں آکھی جیرھا منگل کوں وزیراعظم آفس اچ تھیا ۔اجلاس اچ وزیر بجلی سردار اویس احمد لغاری، مشیر خزانہ و محصولات مفتاح اسماعیل اتے متعلقہ وزارتاں اتے محکمے دے سینئر حکام وی موجود ہن ۔ اجلاس دے دورا ن توانائی دے شعبے متعلق امور تے غو ر کیتا گیا ۔ اجلاس اچ آندے مہینے خاص طور تے رمضان المبارک دے دوران لوڈ مینجمنٹ منصوبے دا جائزہ گھدا گیا ۔ بجلی دے شعبے اچ اصلاحاتی ایجنڈے تے غور کریندے ہوئیں کابینہ کمیٹی توانائی معیاری انسانی وسائل دے حصول اتے وزارت توانائی اچ بھرتیاں دے عمل کوں صحیح خطوط تے استوار کرنڑ سانگے ضروریات دا تخمینہ وختی پورا کرنڑ دی ضرورت تے زور ڈتا تاں جو مطلوبہ انسانی وسائل دی وختی بھرتی کوں یقینی بنڑایا ونج سگے ۔ کابینہ کمیٹی توانائی بجلی دیاں تقسیم کار کمپنیاں (ڈسکوز) کوں ہدایت کیتی جو لائن لاسز اچ گھٹکی تے بجلی دے واجبات دیاں وصولیاں کوں بہتر بنڑاونڑ سانگے موثر اقدامات چاتے ویندے پن ۔
