اسلام آباد ۔ 19 اپریل (اے پی پی) وفاقی وزیر دفاع انجینئر خرم دستگیر خان پولینڈ دے وزیر برائے قومی دفاع دی دعوت تے پولینڈ دا دورہ کریندے پن۔ وارسا پجنڑ تے پولینڈ دے اعلیٰ احکام اتے پاکستان دے سفیر وزیر دفاع خرم دستگیر دا استقبال کیتے۔ایں موقعے تے ڈوہیں ملکاں دے ترانے وجائے گن، وزیر دفاع خرم دستگیر خان کوں پولینڈ دی مسلح افواج دیاں ترناہئیں سروسز دے دستیاں گارڈ آف آنر ڈتا۔بعد اچ ڈوہاں وزیراں ملاقات کیتی اتے وفود دی سطح تے مذاکرات وی کیتن۔ملاقات اچ دفاعی تعلقات و تعاون دے ودھارے،سلامتی دی صورتحال اتے علاقائی معاملیاں تے گالھ مہاڑ کیتی گئی۔پولش وزیر دفاع بلاسزیزک پاکستان نال تعلقات کوں اہم قرار ڈیندے ہوئیں آکھیے جو او پاکستان نال تعلات ودھاونڑ چاہندن۔انجینئر خرم دستگیر خان پولش حکام کوں پاکستان اچ اقتصادی ترقی، جمہوری استحکام ، انسداد دہشت گردی اقدامات ،سلامتی صورتحال، افغانستان اتے خطے اچ امن بارے ڈسایا۔
