حویلیاں ۔ 29 مئی (اے پی پی) وزیر اعظم شاہدخاقان عباسی آکھیے جو پاکستان مسلم لیگ ن سارے ملک اچ سینکڑاں ترقیاتی کم کامیابی نال پورے کیتن جیرھا جو ہک ملکی تاریخ اچ بے مثال کارنامہ اے ،مسلم لیگ ن عوام دی خدمت تے یقین رکھیندی اے ،25جولائی کوں عوام سوچ سمجھ تے اپنڑے ضمیر دے مطابق اساڈی کاکردگی کوں سامنڑے رکھیندے ہوئیں فیصلہ کرے ۔انہاں اے گال منگل کوں 120میل حویلیاں ۔تھاہ کوٹ موٹر وے دا منڈھ بدھیندے ہوئیں آکھی جیرھا جو پاک چین اقتصادی راہداری دا اہم حصہ اے ۔وزیر اعظم آکھیا جو محمد نواز شریف دے وژن دے پیروی کریندے ہوئیں پارٹی اپنڑے سارے وعدے کوں پورا کر ڈتے ،اساں ملک دی ترقی تے خوشحالی تے یقین رکھیندوں ۔وزیراعظم آکھیا جو مسلم لیگ ن اپنڑے پنج سال دے دوراچ پر عزم انداز اچ عوام دی خدمت کیتی تے ملک دے گھٹ ترقی آلے پرے پرے دے علاقیں تے توجہ ڈیندے ہوئیں حقیقی تبدیلی گھن آونڑ سانگے محنت نال کم کیتے ۔ انہاں آکھیا جو مسلم لیگ (ن) دھرنیں اتے غیر شائستہ زبان استعمال کرنڑ دی سیاست تے یقین کائنی رکھیندی ایں ہمیشہ احترام دی سیاست کوں ودھارا ڈتا ۔ شاہد خاقان عباسی آکھیا جو پاکستانی عوام 25 جولائی کوں عوام اپنڑے مستقبل دا فیصلہ کریسن ، عوام جیرھا فیصلہ کریندی اے او ہی قابل قبول ہوندے ۔اساں آندے پنج سال ایندے تے گزارنڑیں ہن تے اساڈی کوشش رہی اے جو حکومت اپنڑی مدت پوری کرے 31 مئی کوں اے مدت پوری تھیندی پئی اے ایندے بعد اساڈی کوشش ہئی جو بہترین نگران وزیر اعظم ڈتا ونجے ایندا اعلان وی کر ڈتا گے ،ہنڑ 25جولائی کوں الکیشن تھیسن فیصلہ عوام کرنڑاں اے ،ایہا ہی جمہوریت اے ۔اے اوہو طریقہ اے جیں نال پاکستان ترقی کریسی ۔وزیراعظم آکھیا جو اے منصوبہ علاقے کوں موٹروے نیٹ ورک دے نال رلا ڈیسی ۔عوامی خوشحالی گھن تے آسی ۔انہاں آکھیا جو حکومت 142ارب روپے دی لاگت نال اے منصوبہ پورا کیتے ،ایں قسم دا وڈا منصوبہ پورا کرنڑ کوئی عام گال نی ۔انہاں آکھیا جو کجھ تکنیکی اوکھ پاروں مانسہرہ تئیں دے حصے دے تکمیل دا کم نومبر تیں دیر تھیونڑ دا باعث بنڑیے تاں جو امید اے جو اگوں تے ڈیڈ لائن تئیں اے پورا تھی ویسی ۔ شاہد خاقان عباسی آکھیا جو مسلم لیگ (ن) ایندے توں پہلے اپنڑے گزریل دوراچ 550کلومیٹر دی موٹر ویز بنڑائیاں تے ہنڑ 1700کلومیٹر دیاں 6رویہ بین الاقوامی معیار دیاں سڑکاں تے کم کریندی پئی اے جیرھا جو گوادر کوں خنجراب تے ولا پشاور کوں کراچی نال رلا ڈیسن ۔ انہاں آکھیا ایندے نال سفر اچ گھٹکی تھیسی ۔ وزیر اعظم آکھیا جو شاہرات دے علاوہ حکومت 5 سالہ مدت اچ بجلی، قدرتی گیس، یونیورسٹیاں ، بنیادی ڈھانچے دے کئی منصوبے پورے کیتن ، مانسہرہ ، شنکیاری توں گزردے ہوئیں خیبر پختونخوااچ تھاکوٹ اچ مک ویسی ۔ منصوبے کوں 3 پیکیج اچ ونڈیا گے جیں اچ حویلیاں۔ایبٹ آباد، ایبٹ آباد۔مانسہرہ اتے مانسہرہ۔تھاکوٹ شامل ہن۔ حویلیاں۔تھاکوٹ سیکشن تے کم 2017ءاچ شروع تھیا تے فروری 2020اچ پورا تھیسی۔335 کلومیٹر طویل خنجراب۔رائے کوٹ تے کم پہلے ہی پورا کر گھدا گے جڈاں جو 144کلومیٹر طویل رائے کوٹ۔ تھاکوٹ سیکشن تے کم تکھے جاری اے ۔ایں موقع تے گورنر خیبرپختونخوا اقبال ظفر جھگڑا ، ڈپٹی سپیکر قومی اسمبلی مرتضیٰ جاوید عباسی، وزیر مذہبی امور سردار محمد یوسف، صوبائی رکن قومی اسمبلی آمنہ سردار، چیئرمین این ایچ اے وی موجود ہن ۔
