شجاع آباد ۔26مئی (اے پی پی) وزیر اعظم شاہد خاقان عباسی آکھے جو پاکستان دی ترقی صرف سیاسی استحکام نال ممکن ہے، اساںہر طرح دے نظام آزمائے ہن جنہاں دے کوئی چنگے نتیجے نی ملے ، پاکستان صرف جمہوریت دے اندر رہ تے اگی تے ودسی۔ پاکستان مسلم لیگ (ن) پنج سالاں اچ ارباں روپے دے ترقیاتی منصوبے نہ صرف شروع کیتے بلکہ پورے وی کروائے جیندی 65سالاں دی تریخ اچ مثال نی ملدی ۔ ملتان ۔سکھر موٹر وے دے ملتان شجاع آباد حصہ دا حصہ بنڑن نال علاقہ دے عوام صرف کجھ گھنٹے اچ لاہور ، کراچی اتے اسلام آباد پج ویسن ۔ایہ منصوبہ مقررہ مدت توں ہک سال پہلے مکمل کیتا ویندا پئے ۔ انہاں خیالیں دا اظہار وزیر اعظم شاہد خاقان عباسی ملتان ، سکھر 294ارب روپے لاگتی منصوبے دے ملتان توں شجاع آباد حصہ دی افتتاحی تقریب نال خطاب کریندے ہوئیں کیتا۔خطاب توںپہلے وزیر اعظم ایں عظیم الشان منصوبے دا افتتاح وی کیتا ۔ وزیر اعظم آکھیا جوشجاع آباد آتے ایں گالھ دی خوشی تھی جو حکومت جیرھے وعدے کیتے ہن نا صرف پورے کیتے بلکہ اانہاں توں ودھ تے کم کر ڈکھائے۔ انہاں آکھیا جوا یہ منصوبہ 2019ءا چ مکمل تھیونڑاںہاجیرھا جوہک سال پہلے مکمل کیتا ویندا پئے ۔ وزیراعظم شاہد خاقان عباسی آکھیا جو پچھلی حکومتاں دے منصوبے کروڑاں دے ہوسن ،پر اساڈ ی موجودہ حکومت صرف پنج سااں اچ ارباںروپے دے منصوبے نا صرف شروع کیتے بلکہ مکمل کروائے اتے ماضی دیاں حکومتاں دے کئی دہائیں توں زیر التواءمنصوبے وی اساں مکمل کرائے ۔انہاں آکھیا جو حکومت مشکل حالات دے باوجود عوام دی خدمت جاری رکھی اتے ایہا فرق پاکستان مسلم لیگ (ن) اتے بئیاںجماعتاں اچ فرق ہے،کیونجو پاکستان مسلم لیگ (ن) خدمت دی سیاست تے یقین رکھیدنی ہے ۔ انہاں آکھیا جوموجودہ حکومت دے منصوبے ہرضلع اچ پورے تھئے ہوئت نظردن۔لیکن ماضی دیاں حکومتاںوسائل دے باوجود کم نی کیتا ۔انہاں آکھیا جونوازشریف دا 1999ءاچ شجاع آباد اچ ہی جلسہ ہا جیرھاڈینھ حکومت کو ں تروڑا گیا۔انہاں آکھیا جوپچھلے پنج سال اچ اتنے کم تھئے ہن جتنے 65سال اچ نی تھئے۔65سال اچ مجموعی طورتے پووے ملک اچ20ہزار میگا واٹ بجلی پیدا کیتی گئی ۔ایندے مقابلے اچ اساڈی حکومت دے دوراچ 10400میگا واٹ بجلی دے منصوبے شروع اتے مکمل تھئے۔انہاں آکھیا جو اساڈی کوشش ہے جو دیہاتی علاقیاں اچ وی بجلی دا نظام چنگا بنڑا یا ونج جا سگے ،اساڈی کوشش ہے جو ایں شدید گرمی اچ لوڈ شیڈنگ گھٹ توں گھٹ ہو ئے اتے خاص طور تے سحری تے افطاری ویلھے بلا تعطل بجلی ملدی رہوے ،2013ءدے مقابلے اچ صورتحال کئی گنا چنگی ہے ۔ انہاں آکھیا جو پرویز مشرف اپنڑے10 سال اچ کوئی بجلی دا منصوبہ کائنی لاتا ہائی اتے پنج سال اچ آصف زرداری وی بجلی دا کوئی کارخانہ کائنی لاتا ہائی ۔ انہاں آکھیا جو اساں10 ہزار میگاواٹ بجلی بنڑائی اتے بئے کارخانے لاتے ویندے پن جیندے نال آندے 20 سال تئیں پاکستان بجلی دے معاملے اچ خودکفیل تھی ویسی ۔ انہاں آکھیا جو اساںنا صرف اج کیتے کم کیتے بلکہ پاکستان دے آونڑ آلے کل سانگے وی کم کیتے اتے پوری دنیا اینکوں منیندی پئی ہے ۔انہاں آکھیا جوا یہ موٹروے دا منصوبہ مکمل ہونڑ دے بعد ملتان توںاڈھائی گھنٹے اچ لاہور،چار گھنٹے اچ اسلام آباداتے کراچی 8گھنٹے دا سفر رہ ویسی ۔ جیرھاجو آندے سال تئیں پورا تھی ویسی ۔ وزیر اعظم شاہد خاقان عباسی آکھیا جو لواری ٹنل 1973ءاچ شروع تھیا پر ایندا کریڈٹ وی سابق وزیر محمد نواز شریف کوں ویندے جنہاںا یہ منصوبہ 28ارب روپے جاری کر تے مکمل کرایا ۔ انہاں آکھیا جو ہک سیاسی فورم ایجھا ہے جیندے توں خیر دی کوئی توقع کائنی ہے ۔اوںفورم توں مندے کڈھنڑ،الزاماں اتے پگ اچھالنڑ دا کلچر متعارف کرایاویندا پئے۔انہاں آکھیا جوجیرھے لوک اج جنوبی پنجاب دا نعرہ لیندے پن ایہ نعرہ انہاں گزریل الیکشن اچ وی لاتا ہا پر انہاں پورے پنج سال ایندے تے کوئی گالھ نی کیتی ۔انہاں آکھیا جو ا یہ نعرہ انتخابی نعرہ نی ہونڑ چاہیدا ۔جنوبی پنجاب سمیت نویاں صوبیاں سانگے قومی اتفاق رائے بنڑاونڑ دی ضرورت ہے،اسان سمجھدوںایں موضوع تے قومی سطح تے مذاکرات تھیونڑ چاہیدن جنہاں اچ ساریاں سیاسی جماعتاں دے لوک شامل ہونڑ ۔انہاں آکھیا جوعوام کوں ایجھے نعریاں نال ورغلایا ویندا پئے ،ہنڑفراڈ کرنڑ دی سیاست کائناں چلسی بلکہ عوامی خدمت دی سیاست چلسی۔جنوبی پنجاب صوبے دا نعرہ لاونڑ آلے ڈکھاونر جو انہاں جنوبی پنجاب دی ترقی سانگے کیا کردار ادا کیتا۔اساں انہاں توں10گنا ودھ ترقیاتی کم ڈکھا سنگدوں ۔ انہاں آکھیا جو سیاست دافیصلہ صرف پولنگ اسٹیشن تے ہوندے، کوئی بیاطریقہ نی ہونڑ چاہیدا۔وزیر اعظم آکھیا جو آکھیا ویندا رہیا جو امپائر انگلی چا ڈیسی لیکن اساں ملک دی خدمت داسلسلہ جاری رکھے ۔وزیراعظم دا آکھنڑ ہا جو شجاع آباد خان گڑھ وچال دریائے چناب تے واقع پل بنراونڑ سانگے فنڈ پی ایس ڈی پی اچ رکھ دتے گن ،جیرھا جو انتخابی وعدہ نی بلکہ ایہ ہک حقیقت ہے اتے ایندے تے وختی کم تھیندا نظرسی ۔ پل بنڑن نال ڈیرہ غازی خان توں ملتان دا 75کلومیٹر داسفر گھٹ تھی تے صرف ست کلو میٹر رہ ویسی۔شجاع آباد توں لودھراں سڑک وڈی کرنڑدا کم وی وختی شروع تھی ویسی۔ جیندی وزیر اعلیٰ شہازشریف اجازت ڈے دتی ہے ۔ وزیر اعظم گزریل شام حادثہ اچ جاں بحق تھیونڑ آلے پنج مزدوراں دی شہادت تے افسوس دا اظہار کیتا اتے آکھیا جو تعمیراتی کمپنی وی جاں بحق اتے زخمی تھیونڑ آلے مزدواں کوں معاوضہ ڈیسی ،ایں سانگے ہدایات جاری کرڈتیان گن ،وزیراعظم وفاقی حکومت ولوں شہیداں دے گھر آلیاں سانگے 10 ،10 لکھ روپے اتے زخمیاں سانگے فی بندہ پنج لکھ روپے دی امداد دا وی اعلان کیتا۔
