اسلام آباد ۔ 20 جولائی (اے پی پی) الیکشن کمیشن ولوںآندے عام انتخابات اچ ٹرن آﺅٹ ودھاونڑ سانگے پرنٹ اتے الیکٹرانک میڈیا سمیت بئے ذرائع توں آگاہی مہم بھرپور انداز اچ جاری اے جڈاں جو ایندے نال نال ووٹراں سانگے رہنما اصول وی جاری کیتے گن جیں دے مطابق پولنگ دے ڈینھ اصل شناختی کارڈ نال گھن آونڑ لازمی قرار ڈتا گے ، پولنگ دے اوقات سویل 8 وجے توں شام 6 وجے تئیں مقرر کیتے گن ۔الیکشن کمیشن دے مطابق پولنگ عملے ڈے موجود ووٹر فہرستاں اچ ووٹرز دیاں تصویراں وی ہوسن، پولنگ سویل 8 وجے توں شام 6 وجے تئیں بغیر کہیں وقفے دے جاری رہسی ۔ قومی اسمبلی سانگے ساوے بیلٹ پیپر جڈاں جو صوبائی اسمبلیاں دے امیدواروں سانگے چٹے بیلٹ پیپرز ہوسن۔ قومی اتے صوبائی اسمبلی سانگے انجھ انجھ بیلٹ باکس پولنگ سٹیشناں اتے بوتھ تے رکھیے ویسن۔ ہر پولنگ سٹیشن تے 4 فوجی اہلکار تعینات ہوسن جیں اچ ڈو 2 پولنگ سٹیشن دے اندر فرائض سرانجام ڈیسن ، حساس پولنگ سٹیشناں تے سی سی ٹی وی کیمرے نصب کیتے ویندے پن ، پولنگ دے سامان تے کجھ علاقیں اچ بیلٹ پیپرز دی ترسیل وی جاری اے، نتیجے دی بروقت ترسیل سانگے رزلٹ ٹرانسمیشن سسٹم متعارف کرایا گے جیں دے ذریعے پولنگ دا عملہ اپنڑے موبائل فون اچ ایپلیکیشن دے ذریعے نتیجے کوں براہ راست الیکشن کمیشن کوں بھیج سگسی۔
