اسلام آباد ۔10 اگست(اے پی پی) 15 ویں نویںمنتخب قومی اسمبلی سنوار کوں حلف چیسی ۔ اجلاس دی صدارت سپیکر قومی اسمبلی سردار ایاز صادق کریسن۔ ایں سلسلے اچ قومی اسمبلی سیکر ٹریٹ سارے انتظامات کوں حتمی شکل ڈتے ڈتی اے ۔ حلف برداری دی تقریب اچ اعلیٰ فوجی تے سول حکام، غیر ملکی سفارت کاراں سمیت اہم شخصیات کو ں دعوت ڈتی گی اے ۔ قومی اسمبلی سیکرٹریٹ دے ذرائع دے مطابق صدر مملکت ممنون حسین ایں سلسلے اچ قومی اسمبلی دا اجلاس 13 اگست (سنوار) کو ں سویل 10 وجے سڈیے ۔ آئین دے آرٹیکل 91(4) دے تحت عام انتخابات دے ڈینھ توں 21 ڈینھ دے اندر قومی اسمبلی دا جلاس کراونڑ لازمی ہے۔ 15 ویں قومی اسمبلی دی حلف برداری دے بعد ارکان قومی اسمبلی فرداً فرداً سپیکر دی دعوت تے حروف تہجی دے اعتبار نال رول آف ممبرز تے دستخط کریسن ۔ قومی اسمبلی دے موجودہ سپیکر نویں سپیکر اتے ڈپٹی سپیکر دے الیکشن دے شیڈول دا اعلان کریسن ۔ساریں توں پہلے نویں سپیکر دا انتخاب تھیسی۔ سپیکر قومی اسمبلی سردار ایاز صادق نویںمنتخب سپیکر توں حلف گھن تے عہدے توں سبکدوش تھی ویسن۔ نویںمنتخب سپیکر اپنڑی زیر نگرانی ڈپٹی سپیکر دا الیکشن کرویسی ۔ واضح رہے جو سپیکر اتے ڈپٹی سپیکر دا انتخاب خفیہ رائے شماری دے ذریعے تھیسی۔ ڈپٹی سپیکر دے الیکشن دے بعد سپیکر قومی اسمبلی دے نویں قائد ایوان دے الیکشن دا شیڈول جاری کریسن۔ نویں قائد ایوان دا الیکشن اوپن ڈویژن دے ذریعے کیتا ویسی ۔ قومی اسمبلی ہال دے ڈوہیں پاسے حکومت تے اپوزیشن دیاں انجھ انجھ لابیاں موجود ہن ۔ڈوہیں لابیاں اچ ارکان قومی اسمبلی اپنڑے اپنڑے امیدوار دے حق اچ ونج تے اپنڑاں ووٹ رجسٹرڈ کرویسن ۔ اکثریتی ووٹ حاصل کرنڑ آلا امیدوار نواں قائد ایوان منتخب تھیسی۔
