اسلام آباد ۔ 26 ستمبر (اے پی پی) وفاقی وزیرمنصوبہ بندی، ترقی و اصلاحات مخدوم خسرو بختیار آکھیے جوپاکستان چین دے تعاون نال گوادر پورٹ کوں دنیا دی جدید ترین بندرگاہ بنڑاتے سمندری رستے توں عالمی تجارت دے ودھارے سانگے چنگے اقدامات کر یندا پئے کیونجو بحیرہ عرب اتے نہر سویز عالمی تجارت دے اہم ترین بحری تجارتی روٹس ہن۔ انہاں خیالیں دا اظہار انہاں قاہرہ اچ ڈو ڈینھ دی عالمی کانفرنس دے موقع تے کیتا ۔وفاقی وزیر آکھیے جو بحیرہ عرب سمندری رستاں توں عالمی تجارت دا مرکز ہے اتے70 فیصد عالمی تجارت ایں رستے توں تھیندی پی ہے جینکوں بیا ودھارا ڈیونڑ سانگے پاکستان اتے عوامی جمہوریہ چین سی پیک منصوبہ شروع کر تے سمندری رستاں توں عالمی تجارت کوں نویں جہت ڈتی ہے ،جیندی وجہ نال گوادر بندرگاہ توں بحیرہ عرب اتے نہر سویزدے رستے عالمی بحری تجارت کوں بیا ودھارا اتے استحکام ملسی۔انہاں کھیے جو پاکستان اتے مصر بی آر آئی ممبراں دی حیثیت نال گزریل 70 سالاں توں بحری تجارتی رستیاں نال جڑے ہوئے ہن ۔ ہنڑ پاک چائنہ راہداری منصوبہ صرف عوامی جمہوریہ چین اتے پاکستان دا منصوبہ نی رہیابلکہ ایندے توں جنوبی ایشیاءسمیت پوری دنیا فائدے چیسی۔ بی آر آئی اتے سی پی ای سی دے ذریعے عالمی تجارت اچ بیا ودھاراتھیسی کیونجو کئی بئے ملکاں وی ایندے اچ شریک تھیونڑ دی خواہش دااظہار کیتے۔انہاں آکھیے جو ساﺅتھ ایشیئن سٹریٹجک سٹیبلیٹی انسٹی ٹیوٹ (ساسی) یونیورسٹی70 سالہ پاک ،مصر سفارتی تے تجارتی تعلقات بارے اچ ایں تقریب دا اہتمام کر تے پوری دنیا دے تجارتی حلقیاں کوں چنگا پیغام ڈیونڑ دا طریقہ اختیار کیتے ۔انہاں آکھیے جو پاکستان بحری تجارت کوں ودھاونڑ سانگے بئے اقدامات وی کریسی اتے عوامی جمہوریہ چین دی سانجھداری اتے تعاون نال گوادر بندرگاہ کوں پوری دنیا دی بحری تجارتی سرگرمیاں دا مرکز بنڑایا ویسی۔
