اسلام آباد ۔ 20 نومبر (اے پی پی) وفاقی وزیر مذہبی و اقلیتی امور و بین المذاہب ہم آہنگی پیر نورالحق قادری آکھیے جو نواں پاکستان پیغمبر اسلام حضرت محمد ﷺ دی تعلیمات اتے اسوہ حسنہ تے مکمل عملدرآمد نال بنڑسی، اے ایجھا پاکستان ہوسی جیں داتصور علامہ اقبال ڈتا تے قائد اعظم محمد علی جناح عملی جامہ پوایا ، نبی کریم ﷺ دی تعلیمات اساں کیتے مشعل راہ زاد راہ ہن، وزیرا عظم دی ہدایت تے آندے سال سال سیرت دیاں کتاباں دے مقابلے دا موضوع ”ریاست مدینہ اتے فلاحی ریاست دا تصور“ رکھیا ویسی ۔اے گال انہاں منگل کو ں اتھاں جناح کنونشن سنٹراچ بین الاقوامی سیرت النبی کانفرنس نال خطاب کریندے ہوئیں آکھی ۔ کانفرنس دا موضوع ”ختم نبوت اتے مسلماناں دیاں ذمے و اریاں ی تعلیمات نبوی دی روشنی اچ “ رکھیا گے ۔ وفاقی وزیر اپنڑے خطاب اچ آکھیا جو اج دی ایں بابرکت کانفرنس اچ شرکت ہک سعادت اے ۔حضور دا ذکر قیامت تئیں جاری رہ ویسی جڈاں جو ساریاں چیزاں مک ویسن تاں میڈا رب میڈے حبیب تے درود سلام بھجیندا رہ ویسی ۔انہاں آکھیا جو وزارت مذہبی امور دے اہتمام نال ہر سال ایں کانفرنس کرائی ویندی اے۔ اجوکے سال وزیراعظم دی ہدایت تے سعودی عرب، ایران، افغانستان، لبنان، شام، ایران ، عراق اتے بئے مملکاں سمیت بھارت توں اجمیر شریف دے سجادہ نشین کو ں وی دعوت ڈتی گئی اے انہاں ایں کانفرنس اچ شرکت کیتی ۔انہاں آکھیا کانفرنس دا مقصد حضرت محمدﷺ دے نال اپنڑی محبت اتے رفتگی ڈااظہار ہے، ایں اظہار سانگے ہرسال سیرت دیاں کتاباں دا مقابلہ رکھیا ویندے ۔اجوکے سال 53 کتاباں اتے مقالہ جات کوں انعام تے ایوارڈز سانگے منتخب کیتا گے ۔ وزیر اعظم دی ہدایت تے آندے سال سیرت دیاں کتاباں دا موضوع ریاست مدینہ اتے فلاحی ریاست داتصور رکھیا گے ۔ وفاقی وزیر آکھیا جوعید میلاد النبیسارے مسلماناں کیتے خوشی اتے بابرکت ڈینھ اے ۔ آپ دی آمدنال دنیا اچ روشنی کھنڈ گئی تے اجالیں دا سفر شروع تھیا۔ نبی کریم اپنڑی زندگی اچ اساکوں بامقصد زندگی گزارنڑ دے سارے طریقے ڈسائے ، فتح مکہ دے ڈینھ نبی کریم دا طرز عمل عفو و درگزر دی بہترین مثال اے، آپ دی تعلیمات اساں کیتے مشعل راہ ہن ۔انہاں آکھیا اساڈی خوش قسمتی ہے جوپاکستان دے وزیر اعظم ہک عاشق رسول ہن جیرھے ننگے پیراں نال نبی پاک ﷺ دے شہر اچ داخل تھیندن اے اساڈا نواں پاکستان ہے ۔ انہاں آکھیا جو نواں پاکستان پیغمبر اسلام حضرت محمد ﷺ دی تعلیمات اتے اسوہ حسنہ تے مکمل عملدرآمد نال بنڑسی ۔ اے ایجھا پاکستان ہوسی جیں دا تصور علامہ اقبال ڈتاتے قائد اعظم محمد علی جناح عملی جامہ پوایا ۔
