پتراجایہ/ اسلام آباد۔ 21 نومبر (اے پی پی) پاکستان ملائیشیا دے نال ہائی ٹیک انڈسٹری اچ سانجھے تعاون کوں ودھارا ڈیونڑ ،بد عنوانی دے خاتمے تے معاشی ترقی دے حصول سانگے ملائشیا دے تجربیں توں فائدہ چاونڑ اچ ودھ ساری دلچسپی دا اظہار کیتے ، پاکستان اتے ملائیشیا دے وزراءاعظم تجارتی عدم توازن دے خاتمے اتے سانجھے تعلقات کوں مزید مستحکم کرنڑ سانگے مذاکرات تے رابطے دی مسلسل ضرورت تے اتفاق کیتے ،وزیراعظم عمران خان انہاں دے ملائشین ہم منصب ڈاکٹر مہاتیر محمد پتراجایہ اچ ملائشیا دے وزیراعظم دے دفتر پردانہ سکوائر اچ مختلف شعبیں اچ سانجھے تعاون تے حوالے نال کیتے گے مذاکرات سانگے کئی دور دے بعد بدھ کوں ملاقات کیتی تے ایں موقع تے مشترکہ پریس کانفرنس نال خطاب دے دوران ڈوہیں رہنماواں بامقصد مذاکرات تے اطمینان دا اظہارکیتا تے جیں اچ ڈوطرفہ تعاون دے ودھارے ، علاقائی اتے بین الاقوامی مسلیں سمیت سانجھے دلچسپی دے امور تے تفصیلی گال مہاڑ کیتی گئی ۔ عمران خان آکھیا جو او وزیراعظم ڈاکٹرمہاتیر محمد نال ملنڑ اچ ودھ ساری دلچسپی رکھیندے ہن تاں جو انہاں دے ملک دی معیشت دی ترقی اتے ملائیشیادی مجموعی قومی پیداوار اچ ودھارے دے حواے نال انہاں دے تجربیں توں فائدہ چاتا ونج سگے ۔ انہاں آکھیا جو ڈوہیں ملکاں دے عوام اپنڑیاں حکومتاں کوں بدعنوانی دے خلاف جدوجہد اتے کرپشن دے خاتمے دا مینڈیٹ ڈتے ۔ وزیراعظم مزید آکھیا جو پاکستان ملائشیا دے تجربیں توں فائدہ چاونڑ چاہندے ۔انہاں آکھیا جو پاکستان ملائیشیا توں سکھنڑ چاہندے جو اوں اپنڑیں قرض دے مسلیں تے کیویں قابو پتے ،ملائیشیا دی سیاحت دے شعبے توں فائدہ چاونڑ دے ذریعے ملکی معیشت دے استحکام اچ کیویں مدد حاصل کیتی ۔پریس کانفرنس دے موقع تے ملائشیا دے وزیراعظم ڈاکٹر مہاتیر محمد آکھیا جو انہاںدا ملک آسیان دے پلیٹ فارم تے پاکستان کوں وی مذاکرات اچ شریک ڈیکھنڑ چاہندے ۔ڈاکٹر مہاتیر محمد پاکستان تے ملائشیا دی روایتی دوستی دا حوالہ ڈیندے ہوئیں آکھیا جو اساں سارے شعبیں اچ ڈو پاسے تعلقات کوں مزید ودھاونڑ دے مختلف ذرائع نال تفصیلی گال مہاڑ کیتی اے ۔انہاں آکھیا جڈاں توں میں اقتدار سنبھالیے تاں وزیراعظم عمران خان پہلے بین الاقوامی رہنما ہن جنہاں ملائشیا دا دورہ کیتے ۔
