نئی دہلی ۔ 13 دسمبر (اے پی پی) بھارتی حکام ”تاج محل“کو ں ڈیکھݨ کیتے شہریاں تے غیر ملکی لوکاں دی فیس اچ ودھارا کر ڈتے ۔ بھارتی خبررساں ادراے دے مطابق حکام محبت دی علامت سمجھے ونجنڑ آلے تاج محل کوں ڈیکھنڑ کیتے آونڑ آلیں دی فیس ودھاڈتی اے ۔ تاج محل کو ں ہر روز 10 توں 15ہزار لوک ڈیکھنڑ آندن جیں اچ اکثریت مقامی شہریاں دی ہوندی اے ۔سال 2016اچ تاج محل کوں ڈیکھنڑ کیتے 65لکھ بندے بھارت آئے ہن ۔حکومت دے نویں اعلان دے بعد ہنڑ تاج محل کوں ڈیکھنڑ کیتے آونڑ آلے مقامی شہریاں کوں 50روپے دی بجائے 250روپے داخلہ فیس ادا کرنڑیں ہوسی جڈاں جو غیر ملکی سیاحواں کیتے 16ڈالر دی بجائے 19ڈالر مقرر کیتی گی اے ۔واضح رہے جو اے مقبرہ مشہور مغل حکمراں شاہ جہاں اپنڑی ذال ممتاز محل دی محبت اچ بنڑوایا ہئی ۔
