اسلام آباد ۔ 16 جنوری (اے پی پی) وزیراعظم عمران خان تاریخی تے ثقافتی ورثے اتے مذہبی سیاحت دی حامل عمارتاں دی نقشہ سازی (میپینگ) وختی مکمل کرنڑ دی ہدایت کریندے ہوئیں آکھیا جو تاریخی تے ثقافتی ورثے دی حامل عمارتاں دے اصل مالک عوام ہن ، سرکاری عمارتاں دے مناسب استعمال دے نال نال انہاں دے تحفظ کوں یقینی بنڑاونڑ سانگے سوچ تبدیل کرنڑ دی ضرورت اے۔انہاں اے گال بدھ کوں اتھاں ثقافتی ورثے دیاں حامل سرکاری عمارتاں دے ولا استعمال دی قومی نگران کمیٹی دے اجلاس دی صدارت کریندے ہوئیں آکھی ۔ اجلاس دے دوران وزیراعظم ہاﺅس، صوبیں اچ گورنر ہاﺅسز، کراچی اتے لاہور اچ سٹیٹ گیسٹ ہاﺅسز، قصر ناز اتے ملک دے مختلف حصیں اچ واقع بیاں عمارتاں سمیت سرکاری عمارات دے مناسب استعمال تے پیش رفت دا جائزہ گھدا گیا۔ ایں موقع تے وزیراعظم آکھیا جو ایندے ڈو مقاصد ہن ، پہلا مقصد تاریخی اہمیت دی حامل انہاں عمارتاں تئیں عوام کوں رسائی ڈیونڑاے جیرھے جو انہاں دے اصل مالک ہن تے ڈوجھا مقصد نظام وضع کر تے انہاں تاریخی عمارات دا تحفظ کرنڑ اے تاں جو انہاں دی ڈیکھ بھال تے مرمت سانگے انہاں توں ریونیو جمع کیتا ونج سگے تے ٹیکس دہندگان دی رقم انہاں دی مرمت دے مقاصد سانگے استعمال نہ تھیوے۔ وزیراعظم سوچ اچ تبدیلی گھن آونڑ تے زور ڈتا جیں نال پبلک عمارتاں دے مناسب استعمال دے نال نال انہا دے تحفظ کوں یقینی بنڑایا ونج سگے۔
