اسلام آباد۔15مارچ(اے پی پی)نیوزی لینڈدے شہر کرائسٹ چرچ دیاں ڈو مسیتاں اچ دہشتگرد حملہ اچ 49نمازی شہیداتے کئی زخمی تھی گین جڈاں جوں بیاں ہلاکتاں دا وی امکان اے۔اے حملہ جمعہ دی نماز دے دوران ڈین ایونیو اتے لِن ووڈ ایونیودیاں مسیتاں اچ اوں ویلھے کیتا گئے جڈاں جمعے دا خطبہ تھیندا پیا ہا، حملہ آوراں نمازیاں تے فائر کھول ڈتا،نماز پڑھنڑ آونڑ آلے بنگلہ دیشی کرکٹ ٹیم دے کھیڈاڑی جان بچا تے نکلنڑ اچ کامیاب ،پولیس ہک تریمت سودھے چار مشتبہ افراد کوں گرفتارکرگھدے،بئے حملہ دی گول جاری اے،نیوزی لینڈ دی وزیراعظم دا واقعے تے اظہار تشویش،ملکی تاریخ دی وڈی دہشتگردی اتے بدترین ڈینہہ قرار ڈے ڈتا۔بین الاقوامی خبر ایجنسیاں دی اطلاعات موجب نیوزی لینڈ دے شہر کرائسٹ چرچ دے علاقیا ں لِن ووڈ ایونیودی مسیت اتے ڈین ایونیوا دی النور مسجدتے مسلح شخص اوں ویلھے فائرنگ کر ڈتی جڈاں جمعہ دا خطبہ تھیندا پیا ہا اتے لوک حالی مسیت آندے پئے ہن۔حملے پاروں49 نمازیاں دے شہید اتے کئی دے زخمی تھیونڑ دی تصدیق کیتی گئی اے۔پولیس کمشنر مائیک ب±ش دے مطابق ہلاکتاںڈین ایوینیو اتے لِن ووڈ ایوینیو دیاں مسیتاں اچ تھین،پولیس ہک تریمت سودھے چار مشتبہ افراد کوں گرفتار کیتے جڈاں جوبئے ہک حملہ آور کوں پکڑن کیتے کوشش جاری اے، حملہ آور النور مسیت دے اندرو وڑ تے نماز کیتے ا ٓونڑ آلیاں تے فائرنگ کیتی اتے چنڑ چنڑ تے ماریے،مرنڑ آلیاں اتے زخمی لوکاں اچ بال اتے تریمتیں وی شامل ہین۔حملے ویلھے بنگلہ دیش دی کرکٹ ٹیم دے کھیڈاڑی وی مسیت آندے پئے ہن بھل فائرنگ دی کاو سنڑ تے بچ نکلنڑ اچ کامیاب تھی گین۔حملے توں بعد پولیس علاقے اچ سرچ آپریشن شروع کرڈتے، سارے سکول بند کر ڈتے گین اتے لوکاں کوں غیر ضروری طور تے باھرونہ ونجنڑ دی ہدایت کیتی گئی اے۔حملے بارے ہک ویڈیو وی سامنڑے آئی اے جیندے اچ حملہ آور کوں فائرنگ کریندے ڈٹھا ونج سگدے۔
