کرائسٹ چرچ مسیتاں تے دہشت گرد حملے توں بعد دی صورت حال تے چنگے طریقے نال نبڑنڑ تے تعریف کیتی ،سانحہ اچ قیمتی جاناں تے ضیان تے پرچاونڑیں
وزیراعظم عمران خان دا نیوزی لینڈ دی وزیراعظم کوں ٹیلی فون اتے دورہ پاکستان دی دعوت ڈتی
اسلام آباد ۔ 21 مارچ (اے پی پی)وزیراعظم عمران خان خمیس کوں نیوزی لینڈ دی وزیراعظم جیسنڈا آرڈرن کوں ٹیلی فون کیتا تے کرائسٹ چرچ اچ ڈو مسیتاں تے دہشت گرد حملے دی مذمت کیتی تے صورتحال نال چنگے طریقے نال نبڑنڑ دی تعریف کیتی ۔انہاں مقامی حکام دے وختی ردعمل اتے وزیراعظم ولوں مسلماناں کیتے بھرپور احترام دے جذبے دی تعریف کیتی ۔ وزیراعظم عمران خان آکھیے جو وزیراعظم جیسنڈا آرڈرن ودھدے ہوئے اسلامو فوبیا اتے عالمی انتہا پسندی دے تناظر اچ بئے عالمی رہنماواں کیتے ہک مثال قائم کیتی اے ۔انہاں پاکستان دے عوام ولوں انہاں دے جذبہ ہمدردی ،قیادت تے فیصیں تے شکریہ اداکیتا،جیں پاکستان اچ لوکاں دے دل جت گھدن ۔ وزیراعظم 50 قیمتی جاناں دے ضیاں تے تعزیت کیتی ۔ انہاں آکھیے جو پاکستان خود وی دہشت گردی دا شکار رہ گے 70 ہزار توں ودھ گناہ جاناں ضائع تھی گن۔ وزیراعظم آکھیے جو ڈکھ دے ایں ویلھے اچ پاکستان نیوزی لینڈ دی حکومت اتے عوام دے رلے کھڑے ۔ نیوزی لینڈ دی وزیراعظم آکھیے جو نیوزی لینڈ ایں واقعے دے بعد ڈکھ اچ ہے۔ انہاں وزیراعظم کوں حملے دے بعد کیتے گے وختی فیصلیں بارے وی ڈسائے جیں اچ فوجی طرز دی نیم خودکار اتے خود کار بندوقاں اتے رائفلز تے پابندی لاونڑ شامل اے ۔ انہاں حملے اچ پاکستانیاں دیاں قربانیاں خاص طور تے نعیم راشد دی جرات تے بہادری کوں خراج عقیدت پیش کیتے ۔ جیسنڈا آرڈرن آکھیے جو نیوزی لینڈ مسلم برادری دی خدمات کوں قدر دی نگاہ نال ڈیکھدے تے انہاں کوں آزادی اتے تحفظ دا یقین ڈیوائے ۔ وزیراعظم عمران خان نیوزی لینڈ دی ہم منصب کوں دورہ پاکستان دی دعوت وی ڈتی ۔
