اسلام آباد ۔ 13 مارچ (اے پی پی) وفاقی وزیر منصوبہ بندی، ترقی تے اصلاحات و شماریات مخدوم خسرو بختیار آکھیے جو چین سی پیک تحت سماجی ترقی سانگے ہک ارب ڈالر گرانٹ ڈیسی، کراچی توں پشاور تئیں ایم ایل ون ریلوے منصوبے تے وزیر ریلوے دی سربراہی اچ کمیٹی بنڑا ڈتی گئی ہے، جاری مہینے مغروبی روٹ دے وڈے منصوبے شروع تھی ویسن۔ انہاں خیالیں دا اظہار خسرو بختیار بدھ کوں کابینہ کمیٹی سی پیک دے اجلاس دے بعد میڈیا نال گالھ مہاڑ کریندے ہوئیں کیتے ۔ وفاقی وزیرآکھیا جو سکھر۔ حیدر آباد موٹروے تے اگلے 6توں 8مہینے تئیں کم شروع تھی ویسی۔ جاری مہینے سی پیک دے مغربی روٹ دے وڈے منصوبے شروع تھیسن۔ انہاں آکھیا جو سی پیک تحت زراعت اتے ایندی مارکیٹنگ اچ ودھار ا ملسی ۔ انہاں ڈسایا جو سی پیک داکوئی فنڈ کہیں بئے شعبے کوں منتقل نی کیتا، سی پیک تحت 28 ارب ڈالر دے منصوبیں تے کم جاری ہے۔ انہاں آکھیے جو زراعت تے جاری مہینے جوائنٹ ورکنگ دااجلاس تھیسی، زرعی مصنوعات ساری دنیا کوں برآمد کیتیاں ویسن۔ انہاں آکھیا جو حکومت ایجھی انڈسٹری لیندی پئی ہے ،جیندی مدد نال چھوٹے کاشتکاراں کوں فائدہ تھیوے اتے ترقی دا پھل ساریاں کوں ملے۔ انہاں آکھیا جوبرآمدات اچ ودھارا کریسوں اتے درآمدات گھٹ کریسوں ۔
