اسلام آباد ۔ 10 اپریل (اے پی پی) وزیر اعظم عمران خان بی بی سی کوں خصوصی انٹرویو اچ آکھیے جوجوہری مسلح ہمسائے اپنڑے جھیڑے صرف مذاکرات نال حل کر سگدن، پاکستان اتے بھارت دی حکومتاں دی پہلی ترجیح غربت اچ گھٹکی تھیونڑ چاہیدی ہے، کشمیر اچ امن خطے سانگے فائدہ مند ہے ،جنگجو گروہواں کوں پاکستان دے مستقبل سانگے غیر مسلح کر یندے پئے ہسے، ایں بارے کوئی باہرلا کوئی پریشر کائنی ۔ہک سوال دے جواب اچ عمران خان آکھیا جو بھارتی وزیر اعظم نریندر مودی کوں کشمیر دا مسئلہ حل کرنڑ پوسی ،ایں مسئلہ کوں نئیں چھوڑیا ونج جا سگدا ۔ انہاں آکھیا جوخطے وچوں غربت مکاونڑ سانگے پاکستان اتے بھارت کو ں اپنڑے جھیڑے مذاکرات نال حل کرنڑ چاہیدن ۔انہاں آکھیا جو ڈوہائیں ملکاں وچال صرف ہکو جھیڑا ہے اتے اوہ کشمیر ہے۔ ڈوہائیں ملکاں کوں کشمیر دا مسئلہ حل کرنڑ چاہیدے، کیونجو کشمیر اچ جو کجھ تھیندا پئے ا وہ اتھاں دے لوکیں دا رد عمل ہے، ایندا الزام پاکستان تے لاتا ویسی، تاں جھیڑا ودھسی ،جیویں ماضی اچ ودھی ہائی۔انہاں آکھیاجو اگر اساں کشمیر دا مسئلہ حل کر گھنوں ،کیونجو برصغیر اچ امن دے زبردست فائدے ہن۔ وزیر اعظم ڈوہائیں ملکاں وچال ٹکر دے خطرات بارے اپنڑے خدشات دا اظہار کریندے ہوئیں آکھیا جو اگر بھارت پاکستان تے دوبارہ حملہ کریندے تاں پاکستان کنوں ایندا جواب ڈیونڑ دے علاوہ کوئی آپشن کائنی ہا۔ ہک بئے سوال دے جواب اچ انہاں آکھیا جو اسا ںشدت پسند تنظیماں کوں غیر مسلح کر یندے پئے ہسے۔ جنگجو گروہواں کوں غیر مسلح کرنڑ دی ایہ پہلی سنجیدہ کوشش ہے۔ وزیر اعظم آکھیا جواساں ایندے خلاف کارروائی دا عزم رکھیندوں ،کیونجو ا یہ پاکستان دے مستقبل سانگے ہے۔ وزیر اعظم آکھیا جو ایں حوالے نال باہرلا کوئی پریشر کائنی ہے۔ وزیر اعظم عمران خان آسیہ بی بی توں متعلق ہک سوال دے جواب اچ آکھیا جو سپریم کورٹ ولوں مذہب دی توہین دے الزام اچ بری تھیونڑ آلی آسیہ بی بی محفوظ ہن اتے اوہ وختی پاکستان چھوڑ ڈیسی۔
