اسلام آباد ۔ 4 اپریل (اے پی پی) وفاقی وزیر قنون تے انصاف ڈاکٹر بیرسٹر محمد فروغ نسیم نال جسٹس پراجیکٹ پاکستان دی سربراہ سارہ بلال خمیس کوںملاقات کیتی۔ وزارت قنون تے انصاف ولوںجاری بیان مطابق جسٹس پراجیکٹ پاکستان دی سربراہ سارہ بلال وفاقی وزیر قنون کوں ملک اچ سزائے موت اچ رحم دیاں درخواستاں دائر کرنڑ توں متعلق کجھ مسئلیاں بارے ڈسایا جوکجھ ٹیکنیکل وجوہات پاروںانہاں اپیلاں کوں مسترد کر ڈتا ویندے۔ انہاں سزائے موت دی اپیلاں دی درخواستاں کوں متعلقہ مطلوبہ معلومات دے نال دائر کرنڑ دی مدد سانگے نظام بنڑاونڑ دی تجویز ڈتی۔ انہاں وزیر قنون کوں پرتشدد جرماں اچ سزائے موت تے پابندی دے طریقیاں بارے وی ڈسایا ،جنہاں اچ بے گناہ جاں بحق تھی ویندن۔ ملاقات دوران بین الاقوامی قوانین اتے عالمی معاہداں تے وی گالھ مہاڑ کیتی گئی۔ وفاقی وزیر قنون تے انصاف ڈاکٹر بیرسٹر فروغ نسیم جسٹس پراجیکٹ پاکستان دی سربراہ دے کم دی تعریف کریندے ہوئیں آکھیا جو وزارت قنون لوکیں دی مشکلاں دے حل اتے عوام کوں انصاف ڈیونڑ سانگے جسٹس پراجیکٹ پاکستان نال رل مل تے کم کریسی۔ ایںموقع تے پارلیمانی سیکرٹری قنون تے انصاف ملیکہ بخاری وی موجود ہن۔
