اسلام آباد ۔ 30 مئی (اے پی پی) وزیر اعظم دے معاون خصوصی برائے قومی صحت ڈاکٹر ظفر مرزا منگل کوں وفاقی کابینہ ولوں انہاں دی وزارت دی سفارش تے تماخوں دی چیزاں تے کھنڈ آلیاں شربتاں تے ہیلتھ ٹیکس دی منظوری کوں تاریخی قرار ڈیندے ہوئیں آکھیے جو اے عوام دی فتح اے ۔خمیس کوں اپنڑے بیان اچ انہاں ایں سلسلے اچ وزیراعظم عمران خان کوں خراج تحسین پیش کریندے ہوئیں آکھیے جو موجودہ معاشی مشکلات دے باجود وزیراعظم دا ایں ٹیکس دی حمایت کرنڑ دے حوالے نال انہاں دے عزم دا آئینہ دار اے ۔انہاں آکھیے جو تماخوں دے استعمال نال ہر سال ہک لکھ سٹھ ہزار لوکاں دی موت تھی ویندی اے ،پورے ملک اچے 15.6 ملین لوک تماخوں دا استعمال کریندن جڈاں جو 6توں 15سال دے 1200بال ہر روز تماخوں نوشی شروع کریندے پن ۔ تماخوں دے استعمال نال آونڑ آلیاں بیماریاں تے انہاں دے علاج تے معاشی ضیان تقرےباً 143.208 بلےن روپے ہن تمباخوں دے استعمال دی حوصلہ شکنی کرنڑ کیتے ریونیو کوں ودھاونڑ کیتے وزارت صحت دی تجویز اے جو 20سگریٹ دی ڈبی ٹے ڈاہ روپے ٹیکس لاتا ونجے ۔ ڈاکٹر ظفر مرزا آکھیے جو کھنڈ آلیاں شربتاں دے استعمال خاص طور تے غیر متعدی مرض اچ ودھارا تھیندا پئے ۔ وزارت صحت سفارش کیتی اے جو ایں سلسلے اچ 250ملی لیٹر دی شربت تے ہک روپے ٹیکس لاتا ونجے ایں اقدام نال جیرھا ریو نیو کٹھا تھیسی او ہیلتھ بجٹ تے مختص کرڈتا ونجے تے غریب عوام کیتے صحت سہولت پروگرام تے مہلک بیماریاں دے علاج معالجے تے خرچ تھیسی۔
