اسلام آباد ۔ 14 جون (اے پی پی) جمعے کوںوزیراعظم عمران خان کرغزستان دے دارالحکومت بشکک اچ شنگھائی تعاون تنظیم (ایس سی او) دے سربراہی اجلاس نال خطاب کریندے ہوئیں خطے اچ امن ،استحکام اتے خوشحالی کیتے 8نکاتی ایجنڈا پیش کرڈتے،پاکستان دی خارجہ پالیسی سارے ملکاں نال چنگے تعلقات تے استوار اے۔ ایس سی او دے پلیٹ فارم نال خطے دی ترقی اتے سانجھے اختلافات دے پر امن حل سمیت غربت مکاونڑ تے سانجھی تجارت دے ودھارے دے حوالے نال ایجنڈا پیش کریندے ہوئیں وزیراعظم تجویز ڈتی جو ایس سی او فنڈ تے ترقیاتی بینک دے قیام ،ثقافتی ،سیاحتی راہداری دا قیام ،بدعنوانی تے وائٹ کالر کرائم مکاونڑ کیتے جامع حکمت عملی تے زور ڈیونڑ دی ضرورت اے ،تصادم کوں مسترد کریندے ہوئیں اساکوں امن بقائے سانجھی بنیاد تے تصادم دے خطرے کوں گھٹ کرنڑاں ہوسی ،خطے دی ترقی کیتے افغانستان اچ امن ضروری اے ،پاکستان افغانستان اچ افغان قیادت دے ذریعے پر امن حل چاہندے ۔افغانستان اچ امن دے قیام کیتے چین تے روس دے تعاون دی تعریف کریندوں ۔انہاں آکھیا مشرق وسطیٰ اتے خلیج دی صورتحال باعث تشویش اے۔ ایس سی او کوں خطے دی ترقی کیتے نینگر تے تریمتاں تے خصوصی توجہ ڈیونڑ دی ضرورت اے تاں جو نینگراں کوں ودھ توں ودھ روزگار دے موقع ڈیونڑ دے نال نال تریمتاں کوں وی بااختیار بنڑایا ونجے ۔ ایس سی او وومن فورم اتے یوتھ کونسل تے مضبوط بنڑا تے ترقی تے خوشحالی کیتے سانجھے استحکام کوں ودھارا ڈتا ونج سگدے ۔انہاں آکھیا جو ایشیا بین الاقوامی تجارت دا مرکز بنڑدا پئے تے ایس سی او کوں چاہیدے جو او خطے سمیت عالمی جھیڑے مکاونڑ کیتے اپنڑاں کردار ادا کرے ۔ وزیراعظم عمران خان ایس سی او دے سربراہ اجلاس دے کامیاب انعقاد تے کرغزستان دے صدر کوں مبارخ ڈیندے ہوئیں صدر اتے کرغز عوام ولوں شاندار مہمان نوازی تے شکریہ ادا کیتا۔ انہاں آکھیا کرغزستان دی خوبصورتی تے معاشرتی مثالی اے ۔وزیراعظم عمران خان آکھیا جو پاکستان مشرق وسطیٰ، چین اتے جنوبی ایشیاءدے ملکاں دے سانجھے رابطے اچ ودھارا چاہندے ۔انہاں آکھیا پاکستان 200ملین توں ودھ آبادی دا ملک اے جتھاں سرمایہ کاری دے پرکشش تے وسیع موقع موجود ہن جتھاں سرمایہ کاری دے پرکشش بہوں سارے موقع موجود ہن ،افرادی قوت تے وسائل دی فراوانی اے ،سیاحت تے انفارمیشن ٹیکنالوجی دے شعبیں سمیت معیشت دے بئے شعبیں اچ ترقی تے سرمایہ کاری دے بہوں سارے امکانات موجود ہن ۔انہاں آکھیا پاکستان مشرقی دنیا اتے ترقی یافتہ ملکاں وچال رابطیں کوں ودھاونڑ چاہندے ۔ وزیراعظم عمران خان آکھیا جو چین پاکستان اقتصادی راہداری منصوبہ (سی پیک) چینی صدر شی جن پنگ دے وژن دا عکاس اے تے اے ہک فلیگ شپ منصوبہ اے جیں دے تحت گوادر دی بندرگاہ کوں بین الاقوامی معیار دے مطابق ترقی ڈتی ویندی پئی اے جیرھی جو مستقبل اچ عالمی تجارت دا اہم ذریعہ ہوسن۔انہاں آکھیا سی پیک نال پاکستان اچ اقتصادی ترقی دی شرح اچ ودھارا تھے ، پاکستان اتے چین اپنڑے آزادانہ تجارت دے معاہدیں دا نویں سروں جائزہ گھن تے تجارت ودھائی اے ۔انہاں آکھیا جو مستقبل اچ پوری دنیا چینی صدر دے ہک سڑک ہک خطے (بی آر آئی) دے وژن دے مطابق ہک سڑک دے آسے پاسے موجود اے، ۔ وزیراعظم عمران خان آکھیا جو دہشت گردی، ماحولیاتی تبدیلیاں اتے منشیات نال دنیا کوں خطرہ اے ، پاکستان دہشت گردی مکاونڑ کیتے بہوں ساریاں قربانیاں ڈتن ،۔انہاں آکھیا مغربی ملکاں اچ اسلامو فوبیا دے منفی تاثر کوں ختم کرنڑاں ہوسی ۔ انہاں ایس سی او دے رکن ملکاں تے زور ڈتا جو او ایں حوالے نال اپنڑاں سفارتی کردار ادا کرن۔انہاں آکھیا اساںسانجھے تعاون دے ذریعے اختلافات دا خاتمہ اتے عالمی سطح تے پر امن ہمسائیگی دے نظریے تے یقین رکھیندوں۔ انہاں رکن ملکاں وچال مقامی کرنسی اچ تجارت کوں ودھارا ڈیونڑ دی ضرورت تے زور ڈیندے ہوئیں آکھیا جو ایس سی او دے پلیٹ فارم توں دنیا دے مختلف خطے دے سانجھے رابطے ودھاونڑ دی لوڑ اے۔انہاں آکھیا عالمی سطح تے دنیا دے مختلف خطیں وچال فاصلیں کوں گھٹ کرنڑ کیتے غربت دے خاتمے تے خصوصی توجہ ڈیونڑیں ہوسی تے ایں حوالے نال اساکوں چین دے تجربے توں فائدہ چاونڑ دی ضروت اے ۔انہاں آکھیا بین الاقوامی رابطیں دا ودھارا غربت مکاونڑ اچ اہم کردار ادا کرسگدے۔
