اسلام آباد ۔ 17 جون (اے پی پی) وزیر اعظم عمران خان سنوار کوں پی ٹی آئی دی پارلیمانی پارٹی دے اجلاس توں خطاب کریندے ہوئیں پی ٹی آئی دے اسمبلی ارکاناں کوں بجٹ منظوری دے عمل اچ متحرک کردار ادا کرنڑ دی تاکید کیتی۔انہاں آکھیا جو بجٹ تے بحث دوران اپوزیشن ولوں اسمبلی کارروائی اچ جانڑ بجھ تے خلل پاونڑ دی کوشش افسوس ناک ہے۔انہاں آکھیا جوموجودہ حکومت اپنڑے دور اقتدار دے پہلے 10 مہیناں اچ مشکل ترین حالات دا سامنڑاں کیتے،جڈاں جو سابقہ حکومتاں ملک کوں قرضیاں دی دلدل اچ سٹیا ۔انہاں آکھیا جوگزریل حکومتاں باہرلے قرضیاں تے شاہی زندگی گزاری، صرف10 سالاں اچ 24 ہزار ارب قرضیاں اچ ودھارا کیتا گیا ۔جیندی تحقیقات سانگے کمیشن بنڑایا گئے۔انہاں دا آکھنڑ ہا جو عوام پی ٹی آئی کوں اسٹیٹس کوکوں مکاونڑ اتے کرپٹ عناصر دے خلاف فیصلہ کن جنگ دا مینڈیٹ ڈتے۔ انہاں آکھیا جو پاکستان تحریک انصاف جڈاں حکومت سانبھی تاں ملک بدترین مالی مشکلاں دا شکار ہا، مشکل حالات اچ متحدہ عرب امارات، سعودی عرب اتے چین ورگے یار ملکاں ولوں تعاون تے انہاں دا شکریہ ادا کریندوں۔ انہاں آکھیا جو پچھلی حکومتاں ملک کوں قرضیاں دے دلدل اچ سٹیا، ملکی آمدن دا تقریبا آدھ حصہ قرضیاں دی قسطاں ڈیونڑ اچ لگدا پئے۔ وزیراعظم آکھیا جو حکومت دی کوششاں نال ملک اچ معاشی استحکام آوسی۔
