ایف آئی اے اچ تفتیش جاری، اپیل زیر التوا ہے، ایں مرحلے تے مداخلت نی کرسگدے ، سپریم کورٹ احتساب عدالت دے سابق جج دی مبینہ ویڈیو متعلق کیس دا 20 اگست کوں محفوظ کیتاگیا فیصلہ جاری کرڈتے
اسلام آباد ۔ 23 اگست (اے پی پی) سپریم کورٹ احتساب عدالت دے سابق جج ارشد ملک ویڈیو سکینڈل متعلق فیصلہ سنڑا ڈتے ۔عدالت آکھیے جو جج ارشد ملک دی 7 جولائی دی پریس ریلیز اتے 11 جولائی دا بیان حلفی انہاں دے خلاف فردجرم اے ، ایف آئی اے اچ تفتیش جاری، اپیل زیر التوا ہے، ایں مرحلے تے مداخلت نی کرسگدے ۔احتساب عدالت دے سابق جج ارشد ملک دی مبینہ ویڈیو متعلق کیس دا فیصلہ سپریم کورٹ 20 اگست کوں محفوظ کیتا ہئی ۔چیف جسٹس آف پاکستان جسٹس آصف سعید کھوسہ دی سربراہی اچ ترائے رکنی بینچ کیس دی سماعت کیتی تے چیف جسٹس آف پاکستانکیس دا فیصلہ سنڑائے۔25 صفحات تے مشتمل فیصلہ چیف جسٹس آصف سعید کھوسہ تحریر کیتے جیں کوں سپریم کورٹ دی ویب سائٹ تے جاری کرڈتا گے ۔ فیصلے اچ آکھیا گے جو اے مرحلہ کائنی جو سپریم کورٹ ویڈیو اتے ایندے اثرات اچ مداخلت کرے ، بالخصوص متعلقہ ویڈیو دا تعلق اسلام آباد اچ زیر التوا اپیل توں اے ۔ فیصلے اچ آکھیا گے جو ویڈیو لیکس دے معاملے تے ایف آئی اے تفتیش شروع کر ڈتی اے ۔ سپریم کورٹ دے فیصلے اچ اے وی آکھیا گے جو معاملے دی تحقیقات تے حکومت یا عدالت ولوں کہیں کمیشن دی قیام دی رائے دا کوئی فائدہ کائنی ۔ جاری کیتے گے فیصلے اچ لکھیا گے جو جج ارشد ملک نواز شریف دے خلاف فیصلہ ڈتا، ارشد ملک لاہور ہائی کورٹ دے ماتحت ہن جیرھے جو ڈیپوٹیشن تے اسلام آباد ہائی کورٹ دے ماتحت احتساب عدالت نمبر 2 اچ تعینات تھن ۔ سپریم کورٹ دے فیصلے اچ اے وی عدالت کوں ڈسایا گے جو ارشد ملک کوں احتساب عدالت دے جج توں ہٹا تے او ایس ڈی بنڑا ڈتا گے۔ ارشد ملک کوں ہنڑ تئیں لاہور ہائی کورٹ کائنی بھجوایا گیا ایندے کیتے محکمانہ کارروائی داحالی آغاز کائنی تھیا۔ فیصلے اچ آکھیا گے جو جج ارشد ملک دی 7 جولائی دی پریس ریلیز اتے 11 جولائی دا بیان حلفی انہاں دے خلاف فرد جرم اے
