اسلام آباد ۔ 5 ستمبر (اے پی پی) پوری دنیا اچ ہر سال 70لکھ لوک فضائی آلودگی پاروں زندگی دی بازی ہر ویندن ،عالمی ادارہ صحت دے معیار دے مطابق دنیا دی 91فیصد آبادی بہوں خراب تے آلودہ ماحول اچ رہندی پئی اے تے عالمی سطح تے 10اچوں 9لوک آلودہ فضا اچ ساہ گھندن ۔ماحولیات دے تحفظ کیتے کم کرنڑ آلے امریکی ادارہ دی تحقیق دے مطابق اے کیو آئی انڈیکس دے تحت کراچی دی فضا اچ آلودگی 331درجے تئیں پج چکی اے جیرھی جو بہوں خطرناک صورت حال دی عکاسی کریندی اے ۔ اے کیو آئی دی درجہ بندی دے مطابق 151 توں 200 درجے تئیں دی آلودگی مضر صحت ہوندی اے جڈاں جو201 توں 300 درجے انتہائی مضر صحت شمار کیتے ویندن جڈاں جو 301 توں ودھ درجہ انتہائی خطرناک تصور کیتا ویندے ۔ انڈیکس دے مطابق کراچی اچ 331 درجے دی آلودگی پاروں شہر خطرناک زون اچ داخل تھی گے ۔ فضائی آلودگی دے مضمرات تے تحقیق کرنڑ آلیں آکھیے جو ایندے نال نہ صرف ذہنی صلاحیت متاثر تھیندی اے بلکہ انسانی اپنڑی جان توں وی ہتھ دھو بہندے ۔
