اسلام آباد ۔ 4 اکتوبر (اے پی پی)دہشتگردی، انتہا پسندی اتے فرسودہ روایات توں متاثرہ شہردیرہ اسماعیل خان اچ گومل یونیورسٹی دیاں شعبہ صحافت توں فارغ التحصیل ”ست سہیلیاں“اپنڑاں انجھ ویب چینل ”لیڈی ٹی وی“شروع کرتے ناقدر معاشرتی رویاں دی زنزیر تروڑتے ہک مثال بنڑا ڈتی اے۔انہاں ”ست سہیلیاں“شعبہ صحافت اچ جو کجھ پڑھیے، سمجھیے اتے سکھیے، اوکوں حقیقت دا رنگ ڈیونر کیتے مختلف میڈیا دفتراں دا در کھڑکائے بھل کہیں وی حوصلہ افزائی نئیں کیتی۔ ایمن شیخ، شفق شیرازی، عروہ احمد، کلثوم شیخ اتے بیاں ترائے سہیلیاںسوشل میڈیا تے ویب پیج اتے ”لیڈی ٹی وی“ویب چینل کھولنڑ دافیصلہ اپنڑے عملی صحافت دے شوق دی تکمیل،تریمتیں دے حقوق،پسماندہ علاقے دے مسائل اگونہا کرنڑ کیتے چاتے۔انہاں لکھ رکاوٹاں اتے کئی کنڈے کڈھنڑ توں بعداخیراپنڑاآپ منوانڑ شروع کر ڈتے۔انہاں داآکھنڑ اے جوگھر آلے اسلام آبادونج تے کم کرنڑ دی اجازت تاں ڈیندے ہن بھل اپنڑے علاقے اچ بہوں پابندی ہئی،دیرہ اسماعیل خان جھیں پسماندہ شہر اچ جتھاں ہر پاسو ہکو جھیں کوآندی ہئی جولوک کیا آکھسن؟کیویں کریسو؟ باہرو نکل تے صحافت کرنڑ کوئی سوکھا نہ ہا،کیوں جڈاں تریمتیں ایں معاشت اچ کجھ ہٹ تے کرنڑچاہندن تاں اوکوں قبول نئیں کیتا ویندا بھل اج اساں بااختیار ہین،اپنڑی مرضی دا کم کریندیاں ہیں،جڈاں لوک سوشل میڈیا تے اپنڑی رائے ڈیندن تاں بہوں کجھ سکھنڑ کوں وی ملدے اتے حوصلہ افزائی وی تھیندی اے۔
