عابد علی کوں مین آف دی میچ اتے مین آف دی سیریز دا ایوارڈ ڈتا گے
کراچی۔ 23 دسمبر (اے پی پی) پاکستان اتے سری لنکا وچال کھیڈے گے ڈو ٹیسٹ میچاں دی سیریز دے ڈوجھے میچ اچ قومی ٹیم 263 رنز توں کامیابی حاصل کرتے سیریز اچ 1-0 نال کامیابی حاصل کر تے نہ صرف سیریز جت گھدی اے بلکہ ورلڈ ٹیسٹ چیمپئن شپ دے ہک میچ اچ کامیابی وی حاصل کرگھدی اے ، ورلڈ ٹیسٹ چیمپئن شپ اچ پاکستان دی پوزیشن تریجھے نمبر تے آگی اے ، پاکستان دے بلے باز عابد علی کوں مین آف دی میچ اتے مین آف دی سیریز دا ایوارڈ ڈتا گے ، کپتان اظہر علی وننگ ٹرافی چاتی۔ نیشنل سٹیڈیم کراچی اچ کھیڈیے گے ٹیسٹ میچ دے چھیکڑی ڈینھ سنوار کوں 11منٹ دے ڈیکھ اچ صرف 16بالاں تے سری لکناں دے باقی ترائے کھلاڑی آﺅٹ تھی گے ۔ سری لنکا اپنڑی ڈوجھی نامکمل اننگ دا آغاز کیتا تاں پہلی ہی بال تے انہاں دے کھلاڑی لاسیتھ ایمبول ڈینایا کوئی رن بنڑائے بغیر نسیم شاہ دی گیند تے وکٹ کیپر محمد رضوان دے ہتھوں کیچ آﺅٹ تھی گے ۔ امپائر جے ایس ولسن لاسیتھ ایمبول ڈینایا کوں ناٹ آﺅٹ قرار ڈتا لیکن باﺅلنگ ریویو گھننڑ تے لاسیتھ ایمبول ڈینایا کوں آﺅٹ قرار ڈتا ۔ جیں دے بعد ویشوا فرنینڈو وکٹ تے کھیڈنڑ کیتے آئے، ایں موقع تے نسیم شاہ ہیٹ ٹرک تے ہن تاں جو او ہیٹ ٹرک کرنڑ اچ ناکام رہیے۔ سری لنکن ٹیم دے اوپنر اوشادہ فرنینڈو وی پاکستانی بالر یاسر شاہ دا سامنا کرنڑ اچ ناکام رہیے تے انہاں وی اپنڑے انفرادی سکور 102 رنز ودھائے بغٰر میچ دی گیارویں گیند تے واپس ول گے۔ جیں دے بعد ویشوا فرنینڈو وی کوئی رن بنڑائے بغیر نسیم شاہ دی بال تے ایل بی ڈبلیو آﺅٹ تھی گے ۔ ویشوا فرنینڈو بیٹنگ ریویوگھدا لیکن ٹی وی امپائر انہاں کون آﺅٹ قرار ڈتا۔ اینویں سری لنکن ٹیم دے باقی مانندہ ترائے کھلاڑی اپنڑے گزریل ڈینھ دے سکور 212 رنز اچ کوئی ودھارا کیتے بغیر آﺅٹ تھی گے ۔ پاکستان دے بالر نسیم شاہ 12.5 اوورز اچ31 رنز دے عوض 5 کھلاڑیاں کوں پویلین دا رستہ ڈکھایا جڈاں جو یاسر شاہ 20 اوورز اچ 2 کھلاڑیاں کوں آﺅٹ کیتے ۔ اینویں شاہین شاہ آفریدی، محمد عباس اتے حارث سہیل ہک ہک وکٹ گھدی۔ نسیم شاہ 16سال 307 ڈینھ دی عمر اچ ہک اننگ اچ 5 وکٹاں گھن تے دنیا دے ڈوجھے بالر بنڑ گن جنہاں بہوں گھٹ عمر اچ 5 وکٹ گھننڑ دا اعزاز گھدے ایندے توں پہلے پاکستان دے نسیم الغنی اے اعزاز 16سال 303 ڈینھ دی عمر اچ حاصل کیتا ہئی ۔ میچ اچ پاکستان دے چار کھلاڑیاں شان مسعود، عابد علی، کیپتان اظہر علی اتے بابراعظم سینچریاں سکورکیتیاں جڈاں جو قومی ٹیم دے باﺅلرز شاہین شاہ آفریدی اتے نسیم شاہ 5، 5 کھلاڑیاں کوں آﺅٹ کیتے ۔ میچ اچ پاکستان ٹاس جت تے پہلے بیٹنگ کرنڑدا فیصلہ کیتا ہئی انہاں اپنڑی اننگ اچ 191 رنز بنڑائے جیں دے جواب اچ سری لنکا 271 رنز بنڑا تے 80 رنز دی برتری گھدی۔ پاکستان ٹیم دے ابتدائی چارے بلے بازاں شان مسعود، عابد علی، کپتان اظہر علی اتے بابراعظم ڈوجھی اننگز اچ سنچریاں سکور کر تے قومی ٹیم دے خلاف نہ صرف 80 رنز دی برتری کوں ختم کیتا بلکہ 555 رنز دا وڈا سکور کرتے سری لنکن ٹیم کوں ڈوجھی اننگز اچ میچ جتنڑ کیتے 264 رنز دا ٹارگٹ ڈتا ، لنکن ٹیم ٹارگٹ پورا کرنڑ کیتے ڈوجھی اننگ کھیڈنڑ کیتے میدان اچ لتھی لیکن انہاں دے صرف ڈو بلے باز پاکستانی باﺅلرز دا کجھ حد تئیں سامنڑاں کیتا جڈاں جو بئے کھلاڑی وقفے وقفے نال آﺅٹ تھی تے واپس ویندے رہیے ۔ لنکن ٹیم دے اوپنر اوشادہ فرنینڈو 102 رنز جڈاں جو وکٹ کیپر نیروشن ڈیک ویلا 65 رنز بنڑائے۔ پاکستان دے عابد علی کوں شاندار بیٹنگ دا مظاہرہ کرنڑ تے میچ اور سیریز دا بہترین کھلاڑی قرار ڈتا گیا ۔
