واشنگٹن ۔ 28 اگست (اے پی پی) امریکہ اچ مہلک کورونا وائرس توں متاثرہ لوکاں دی تعداد 60 لکھ 46ہزار توں ودھ گئی اے جڈاں جو ملک دیاں مختلف ریاستاں اچ مہلک وائرس پاروں ہنڑ تئیں ہک لکھ 84 ہزار توں ودھ ہلاک تھی گن ۔جمعے کوں امریکی ذرائع ابلاغ موجب ملک اچ کورونا وائرس دے مریضاں دی تعداد مسلسل ودھدی ویندی اے ۔ امریکی حکام موجب ملک اچ کورونا وائرس دے فعال متاثرین دی تعداد 25 لکھ 13ہزار توں ودھ اے جڈاں جو ایں مہلک وائرس توں پورے ملک اچ ہنڑ تئیں 184796بندے ہلاک تھی چکن ۔ امریکی محکمہ صحت موجب ملک اچ کورونا وائرس دے کیساں دی مجموعی تعداد6046634 تئیں پج گئی اے ۔ کورونا وائرس دی وبا توں امریکہ ساریں توں ودھ متاثر تھئے ۔ امریکہ دے بعد برازیل اچ مریضاں دی تعداد ودھ اے جڈاں جو بھارت کورونا وائرس توں متاثر تھیونڑ آلا تریجھا ملک اے ۔روس، جنوبی افریقہ، پیرو، میکسکو اتے چلی اچ وی لکھاں لوک وائرس توں متاثر تھئن ۔ امریکہ اچ کورونا وائرس دے پہلے کیس دی تشخیص ایں سال 22 جنوری کوں تھئی ہئی ۔ امریکہ اچ کورونا دے فعال متاثرین دی تعداد2513898 اے۔حکام موجب ملک اچ ہنڑ تئیں کورونا وائرس توں متاثرہ3347940 لوک صحت یاب تھی چکن ۔
