لزبن ۔ 24 اگست (اے پی پی) بائرن میونخ چھیویں واری یوئیفا فٹ بال چیمپئنز لیگ جت گھدی، فاتح ٹیم انتہائی سخت مقابلے دے بعد پیرس سینٹ جرمین کوں 1-0 گول توں شکست ڈے تے ٹائٹل آپ دے ناں کر گھدے ، کنگسلی کومن بائرن میونخ ولوں ہک گول کرتے آپ دی ٹیم دی جت اچ اہم کردار ادا کیتا ۔ سنوار کوں پرتگال اچ لزبن دے سٹیڈیو ڈا لوز سٹیڈیم اچ کھیڈےے یوئیفا چیمپئنز لیگ دے فائنل میچ اچ بائرن میونخ اتے پیرس سینٹ جرمین دیاں ٹیماں آمنڑے سامنڑے ہن جیں اچ ڈوہیں ٹیماں وچال سخت مقابلہ ڈیکھنڑ کوں ملیا ،ڈوہیں ٹیماں ہک ڈوجھے دے گول پوسٹ تے حملے کیتے تاں جو میچ دا پہلا ہاف بغیر کہیں گول دے برابری تے مک گیا ۔ڈوجھے ہاف اچ بائرن میونخ دے کنگسلی کومن میچ دے 59 ویں منٹ اچ سر نال گول کر تے آپنڑی ٹیم کوں پیرس سینٹ جرمن دے خلاف 1-0 گول دی برتری ڈیوا ڈتی جیرھا جو میچ دے چھیکڑ تئیں برقرار رہی ۔سخت مقابلے دے بعد بائرن میونخ پیرس سینٹ جرمین کوں 1-0 گول توں شکست ڈے تے چھیویں واری یوئیفا فٹ بال چیمپئنز لیگ دا ٹائٹل جت گھدا۔
