اسلام آباد ۔ 29 ستمبر (اے پی پی) وفاقی وزیر تعلیم و پیشہ ورانہ تربیت شفقت محمود آکھیے جو تریجھے مرحلے اچ ملک دے سارے پرائمری سکول وی کھول ڈتے ویسن ، ایس او پیز تے سختی نال عمل درآمد کرایا ویندا پئے جیرھا جو تعلیمی ادارے ایس او پیز تے عمل درآمد نہ کریسن انہاں کوں بند کرڈتا ویسی ۔ منگل کوں این سی او سی اچ پریس کانفرنس توں خطاب کریندے ہوئیں شفقت محمود آکھیا جو تعلیمی اداریں کوں کھولنڑ دے حوالے نال فیصلہ کیتے سارے صوبیں کوں آن بورڈ گھدے ۔ انہاں آکھیے جو تریجھے مرحلے اچ پرائمری سکولاں کوں کھولنڑ دا فیصلہ اعداد وشمار کوں سامنڑے رکھیندے ہوئیں کیتا گیا ۔15 ستمبر توں سکول کھلنڑ دے بعد اساتذہ، سکول اسٹاف اتے طلباءدے ہک لکھ 71 ہزار 436 ٹیسٹ کیتے گئن جیں اچوں 1284 ٹیسٹ مثبت آئے جیرھا جو 0.89 فیصد اے۔ وزیر تعلیم آکھیا جو او والدین کوں یقین ڈویندن جو ایس او پیز تے پوری طرح عمل درآمد کرایا ویندا پئے جیرھے سکول ایس او پیز تے عمل نہ کریسن انہاں کوں بند کرڈتا ویسی ۔ وفاقی اتے صوبائی محکمے ایس او پیز تے عمل درآمد کراونڑ کیتے کم کریندے پئن ۔ ایس او پیز تے مزید سختی کیتی ویسی ۔ انہاں آکھیے جو والدین اتے استاداں کوں خراج تحسین پیش کریندوں جنہاں ایس او پیزتے عمل درآمد کرنڑ اچ اہم کردار ادا کیتے ۔اے ہک سانجھی کوش ہئی جیں کیتے او مبارخ باد دے مستحق ہن۔تریجھے مرحلے اچ چھوٹے بالاں دے سکول کھولیے گئن ۔ڈو چیزاں دا خاص خیال رکھیا ونجے ، پہلا بالاں کوں ہک جاہ تے جمع نہ تھیونڑ ڈتا ونجے تے ڈوجھا ماسک پاونڑ کوں یقینی بنڑایا ونجے ۔ایں موقع تے وزیراعظم دے معاون خصوصی صحت ڈاکٹر فیصل سلطان وی موجود ہن۔
