وزیراعظم عمران خان دی دیانت داری، سچائی اتے محنت تے ساری قوم متفق اے، وزارت داخلہ 120 ݙینھ اچ بدل ویسی ، وزیر داخلہ شیخ رشید احمد

اسلام آباد۔23دسمبر  (اے پی پی):وزیر داخلہ شیخ رشید احمد آکھیے جو وزیراعظم عمران خان دی دیانت داری، سچائی اتے محنت تے ساری قوم متفق اے، او مسئلے چنڳے طریقے نال نبڑدے پئن ، سیاسی، معاشی بحراناں توں قوم کوں کڈھ تے اڳوں گھن ویسن ،  وزارت داخلہ 120 ݙینھ اچ بدل ویسی ، عوام کوں سہولتاں ݙیسوں ، پارکس اتے باغات کوں بہتر بݨیسوں ، ناکے ختم کرݙتن، پولیس کوں مزید گاݙیاں ݙیسوں ، اے ڳالھ انھاں ٻدھ کوں اتھاں پولیس دی پاسنگ آؤٹ پریڈ دی تقریب توں خطاب کریندے ہوئیں آکھی اے ۔وزیراعظم عمران خان کوں الویندے ہوئیں انھاں آکھیے جو اللہ تعالیٰ تساکوں عزت ݙتی اے تے تساں پولیس کوں عزت ݙتی اے، تساں پہلے وزیر اعظم او جیں پولیس دی پاسنگ آؤٹ تقریب اچ شرکت کیتی اے ،ایندے نال کراچی توں طور خم تئیں امن وامان دا فریضہ سر انجام ݙیوݨ آلے ہر جوان کوں اڄ عزت ملی اے تے انہاں دا سر فخر نال اچا تھئے۔ انہاں آکھیے جو اسلام آباد اچ پنج سو کمیرے خراب ہن ،ہݨ سارے اٹھارہ سو کیمرے درست کم کریندے پئن، پولیس چوکیاں جتھاں شہریاں کوں تنگ کیتا ویندے ہݨ ختم کرݙتن ، صرف ترائے چوکیاں باقی ہن او وی مزید گاݙیاں ملݨ تے ختم کرݙتیاں ویسن ۔انھاں آکھیے جو وزیر اعظم جیویں کم کریندے پئن انہاں دا ڈنکا صرف پاکستان نی ، دنیا وچ وڄسی ، اسلام آباد اچ بہترین ٹیم کم کر یندی پئی اے، پولیس دی ہاؤسنگ کیتے ݙوسو کنال زمین ملی اے۔  وزیراعظم توں درخواست اے جو چار سو کنال ݙیوݨ دے احکامات جاری کرن۔