وفاقی وزیر رانا تنویر حسین دی صدارت اچ اولیو کلچر پراجیکٹ وچ پیشرفت دا جائزہ گھنݨ کیتے پراجیکٹ ٹیم دا اجلاس

اسلام آباد۔ 15 ستمبر (اے پی پی) وفاقی وزیر قومی غذائی تحفظ تے تحقیق رانا تنویر حسین اولیو کلچر پراجیکٹ دی پیشرفت تے ایں تے عملدرآمد دا جائزہ گھنݨ کیتے پراجیکٹ ٹیم دا اجلاس منعقد کیتا۔ اجلاس وچ پراجیکٹ ہیڈ ڈاکٹر محمد طارق ٹیم دی قیادت کیتی۔ اجلاس وچ ملک وچ جامع قومی اولیو ویلیو چین دے ودھارے دے حوالے نال اقدامات دا وی جائزہ ڳھدا گیا۔ وزارتِ قومی غذائی تحفظ تے تحقیق دے اعلامیے موجب وفاقی وزیر ایں گالھ تے زور ڈتا جو زیتون دی پیداوار کوں صرف شجرکاری تئیں محدود رکھݨ دے بجائے پیداوار، ایکسٹریکشن، پروسیسنگ، ذخیرہ، پیکیجنگ، معیار دی جانچ تے مارکیٹنگ تے مشتمل مکمل ویلیو چین قائم کیتی ونڄے جیندا بنیادی فیدہ کساناں کوں پڄݨا چاہیدے۔ اجلاس کوں ڈسایا ڳیا جو نظرثانی شدہ منصوبے دے تحت ترائے سالاں دے دوران تقریباً 15 ہزار ایکڑ رقبے تے شجرکاری تے 20 لکھ زیتون دے ٻوتے ݙیوݨ دا ہدف اے۔ وفاقی وزیر پراجیکٹ ٹیم کوں کلسٹرز دی بنیاد تے حقیقت پسندانہ اہداف مقرر کرݨ تے شجرکاری و ٻوٹیں دی دستیابی مزید ودھاوݨ دے امکانات دا جائزہ گھنݨ دی ہدایت کیتی۔ رانا تنویر حسین پوٹھوہار دے زیتون دے موجودہ پوٹینشل کوں بھرپور طریقے نال کارآمد بݨاوݨ تے زور ݙیندے ایں کوں منصوبے وچ مناسب طور تے شامل کرݨ دے طریقہ کار دا جائزہ گھنݨ دی ہدایت کیتی۔ انہاں زیتون دے شعبے وچ پروسیسنگ، انفراسٹرکچر تے ویلیو ایڈیشن کیتے نجی شعبے دی شمولیت کوں وی ضروری قرار ݙتا۔ وفاقی وزیر ہدایت کیتی جو زیتون دے کلسٹرز وچ ایکسٹریکشن تے پوسٹ ہارویسٹ سہولتاں دی مناسب دستیابی یقینی بݨائی ونڄے جݙاں جو معیار، ذخیرہ تے ٹیسٹنگ دے نظام کوں مزید مؤثر بݨایا ونڄے۔ انہاں زیتون دے ضمنی اجزا خصوصاً پومیس کوں تجارتی طور تے استعمال کرݨ دے امکانات دا وی جائزہ گھنݨ دی ہدایت کیتی۔ رانا تنویر حسین مشینری دی ضرورتاں تے اخراجات کوں حقیقت پسندانہ بنیاداں تے ول جانچݨ تے قابلِ پیمائش اہداف تے مشتمل واضح عملدرآمد تے مبنی منصوبہ تیار کرݨ دی ہدایت کیتی۔ وفاقی وزیر ایں عزم دا اعادہ کیتا جو اولیو پروگرام کوں قومی اولیو ویلیو چین دی بنیاد بݨا تے پاکستان دے ودھدے زیتون دے پوٹینشل کوں کساناں دی آمدݨ وچ ودھارے، ویلیو ایڈیشن، معیاری مصنوعات تے ہک پائیدار اولیو انڈسٹری وچ بدالیا ویسی۔