پاکستانیاں دی طرفوں بھیجی ونڄݨ آلی ترسیلاتِ زر قومی معیشت کیتے اہم اے، انہاں دے حقوق،عزت تے فلاح و بہبود دا تحفظ ریاست دی ذمہ واری تے قومی فریضہ اے، سید یوسف رضا گیلانی

اسلام آباد۔ 15 ستمبر (اے پی پی) چیئرمین سینیٹ سید یوسف رضا گیلانی آکھیے جو تقریباً 70 لکھ ٻاہرلے ملکاں اچ رہݨ آلے پاکستانی ملکی معیشت وچ اہم کردار ادا کریندے پئن، انہاں دی طرفوں بھیجی ونڄݨ آلی ترسیلاتِ زر قومی معیشت کیتے اہم اے ، ایں واسطے ٻاہرلے ملک پاکستانیاں دے حقوق، عزت تے فلاح و بہبود دا تحفظ ریاست دی ذمہ واری تے قومی فریضہ اے۔ پاکستان وچ مائیگریشن گورننس دے حوالے نال پہلے پارلیمانی ڈائیلاگ نال خطاب کریندے انہاں آکھیا جو پاکستانی محنت کشاں دے حقوق دا تحفظ، قانونی ذرائع نال نقل مکانی دا ودھارا تے محفوظ، منظم تے باقاعدہ نقل مکانی یقینی بݨاوݨ کیتے موثر اقدامات ناگزیرہن۔ چیئرمین سینیٹ آکھیا جو ٻاہرلے ملک پاکستانیاں کوں نسل پرستی، اسلاموفوبیا تے ٻئے تعصبات توں تحفظ ݙتا ونڄݨا چاہیدے، ریاست دی ذمہ واری اے جو اوکھے تے لوڑھ ویلھے اپݨے شہریاں دے نال کھڑی تھیوے جݙاں جو تارکینِ وطن دے حقوق تے مفادات دے تحفظ کیتے پارلیمانی رابطہ کاری کوں مزید موثر بݨایا ونڄے۔ انہاں آکھیا جو مائیگریشن گورننس سیاسی وابستگیاں توں بالاتر ہک اہم قومی مسئلہ اے جیڑھا ملک دے لکھاں خانداناں کوں متاثر کریندے، اس واسطے سیاسی جماعتاں وچال وسیع تر پارلیمانی اتفاقِ رائے ضروری اے۔ شواہد تے مبنی قانون سازی، ادارہ جاتی مکالمے تے پارلیمانی کمیٹیاں تے متعلقہ ریاستی اداریں وچال تکڑے رابطے ایں ضمن وچ اہم کردار ادا کرسگدن۔ سید یوسف رضا گیلانی موسمیاتی تبدیلی تے نقل مکانی دے ودھدے تعلق تے خصوصی توجہ ݙیوݨ دی لوڑھ تے زور ݙیندے آکھیے جو موسمیاتی اثرات نال نبڑݨ تے جبری نقل مکانی وچ کمی کیتے موثر حکمتِ عملی ضروری اے جݙاں جو بین الاقوامی موسمیاتی مالی معاونت بالخصوص گرانٹس دی صورت وچ ݙتی ونڄݨی چاہیدی اے۔ قابلِ اعتماد اعداد و شمار، تحقیق تے مسلسل مکالمے نال مائیگریشن گورننس کوں مزید موثر بݨایا ونڄ سگدے۔ پارلیمانی ڈائیلاگ کوں مستقل پارلیمانی اقدام دے طور تے جاری رکھݨ تے اس دے نتیجے وچ سامنے آوݨ آلی سفارشات کوں موثر قانون سازی تے پالیسی اقدامات وچ ڈھالݨ دی لوڑھ اے ۔چیئرمین سینیٹ آکھیا جو سینیٹ ٻاہرلے ملک پاکستانیاں دے حقوق تے مفادات دے تحفظ کیتے اپݨا کردار ادا کرݨ کیتے پرعزم اے۔