معاشرے دی سنڄاݨ کمزور طبقے نال سلوک توں کیتی ویندی اے ، اسلام آباد پولیس کوں نویں پاکستان وانڳوں نویں پولیس دے طور تے نظر آوݨا چاہیدے، وزیر اعظم عمران خان داپولیس لائنز اچ تقریب توں خطاب

اسلام آباد۔23دسمبر (اے پی پی):وزیر اعظم عمران خان آکھیے جو معاشرے دی سنڄاݨ کمزور طبقے نال سلوک توں کیتی ویندی اے ، اسلام آباد پولیس کوں نویں پاکستان وانڳوں نویں پولیس دے طور تے نظر آوݨا چاہدے ، عام شہری کوں عزت ݙتی ونڄے ، پولیس کوں ہیلتھ کارڈ دی سہولت ݙیسوں ، نواں پاکستان ہائوسنگ اچ انھاں کوں قسطاں تے گھر ݙتے ویسن ، تنخواہیں ودھاوݨ تے غور کیتا ویسی ، فوج ملکی سرحداں اتے پولیس عوام دے جان و مال دی محافظ اے، حرام پیسہ کماوݨ آلے اڄ عبرت دا نشان بݨیے ودن، بے تحاشہ پیسہ ہووݨ پاروں کݙاہیں ہسپتالاں اچ ویندے پن تے کݙاہیں ملک توں ٻاہر ، ٻال وی ٻاہر بھج ڳئن تے پیو دی چوری لکاوݨ کیتے کوڑ مارݨا پوندا پئے ۔اے ڳالھ انھاں ٻدھ کوں اتھاں پولیس لائنز اچ پاسنگ آئوٹ پریڈ دی تقریب توں خطاب کریندے ہوئیں آکھی اے ۔ وزیرا عظم عمران خان آکھیے جو پاس آئوٹ تھیوݨ آضے پولیس اہلکاراں کوں کامیابی تے مبارخ ݙٰینداں ۔انھاں آکھیے میݙے اتھاں آوݨ دا مقصد اے سنھیا ݙیوݨا اے جو اے اساݙی پولیس اے اساکوں انھاں کوں عزت ݙیوݨی اے ۔انھاں آکھیے معاشرے اچ وݙا مقام ہوندے ،پولیس کوں معاشرے اچ جائز مقام نی میلا ایندی تاریخی وجوہات ہن ۔ انگریزاں پولیس دے ذریعے عوام کوں دٻایا۔ ایں کیتے عوام اچ پولیس دا ݙر ہئی ۔حالانہ انھاں دے آپدے ملک اچ پولیس ایجھی کائناں ہئی ،اتھاں پولیس شہریاں کوں آپݨاں سمجھدی ہئی تے شہری وی پولیس کوں آپدا محافظ سمجھدے ہن لیکن اتھاں رویہ مختلف ہئی میݙٰی خواہش اے جو پاکستان دی پولیس وی ایجھی ہووے عوام انہاں تے اعتماد کرے تے انہاں کوں آپدا سمجھن۔ وزیراعظم آکھیا جو اساں خیبرپختونخوا اچ پولیس کوں بدالیے ۔پولیس دہشت گردی دا شکار ہئی تے ایندے 500 جوان شہید تھی چکے ہن تے مورال ڈائون ہئی لیکن اے پولیس ایجھی بدلی جو مردان دے شہریاں پولیس دی حمایت اچ بلوس کڈھیے ۔ وزیر اعظم نینگراں کوں تاکید کیتی جو اورزق حلال دا راستہ اختیار کرن ۔انھاں آکھیے جو نیکی دے رستے تے چلݨ سوکھا نی لیکن ایندے تے چلݨ کامیابی اے ۔وزیراعظم آکھیا جݙاں میں کرکٹ کھیݙدا ہم تاں سائوتھ افریقہ اچ کرکٹ کھیݙ تے ٻہوں پیسہ کما سڳدا ہم جݙاں کپتان بݨیا تاں ہندوستان دے بکیز  ٻہوں پیسے دی آفرز کیتی لیکن ھک رستہ شیطانیت  تے ݙوجھا رستہ عظمت دا رستہ اے جیڑھا جو اللہ دے نبی ﷺ دا راستہ اے ۔ اساکوں ایں رستے تے چلݨاں اے۔