مریم نواز دا لاڑکانہ ونڄݨ”اتوں لڑائی اندروں بھیݨ بھرا ” دی تاریخی حقیقت دا منہ ٻولیندا ثبوت اے ، وفاقی وزیر اطلاعات و نشریات شبلی فراز

اسلام آباد۔27دسمبر  (اے پی پی):وفاقی وزیر اطلاعات و نشریات سینیٹر شبلی فرازآکھیے جو اڄ ذوالفقار علی بھٹو اتے بی بی شہید دی روح کوں پڄدی پئی ہوسی ،  انہاں دے فلسفے اتے نظریات دے بد ترین مخالف اڄ انہاں دے گھر ٻیٹھن ، انہاں دا ایجنڈا اپݨی ذات توں شروع تھی تے اپݨی ذات تے ختم تھی ویندے ۔ اتوار کوں اپݨے ٹویٹ اچ وفاقی وزیر اطلاعات سینیٹرشبلی فراز آکھیے جو انہاں ݙے عوام کیتے کجھ کائنی ۔ انہاں آکھیے جو مریم نواز دا لاڑکانہ ونڄݨ”اتوں لڑائی اندروں بھیݨ بھرا ” دی تاریخی حقیت دا منہ ٻولیندا ثبوت اے ۔ لاہور اتے لاڑکانہ دیاں سڑکاں تے ہک ݙوجھے کوں گھیلݨ دے اعلان کرݨ آلے ہک ݙوجھے دے گھراں دے مہمان بݨ ڳئن ، انہاں آکھیے اے انہاں دی اصلیت اے ، اے عوام دے سامݨے کجھ تے پچھوں کجھ ٻئے ہن ملک اچ جݙاں وی کرپشن، ݙو نمبری، ہارس ٹریڈنگ، چھانگا مانگا، چمک اتے بریف کیس دا ناں آسی تاں نواز شریف دا ناں آسی، انہاں آکھیے جو عمران خان عوام دا تابعدار اتے چوراں لٹیراں کیتے تھاݨے دار اے۔