اسلام آباد۔17دسمبر (اے پی پی):وزیر اعظم عمران خان آکھیے جو حکومت ملکی تاریخ اچ پہلی واری تخفیف غربت و سماجی تحفظ دا وسیع پروگرام گھن تے آئی اے، ،نواں پاکستان صحت کارڈ دنیا دا منفرد ہیلتھ انشورنس پروگرام اے جیں دی پوری دنیا اچ مثال نی ملدی ،عوامی فلاح دے منصوبیں کوں ترجیحی بنیاداں تے مکمل کرنا حکومت دی اولین ترجیح اے۔جمعے کوں وزیر اعظم میڈیا آفس توں جاری بیان موجب وزیرِ اعظم عمران خان دی سربراہی اچ پنجاب اچ جاری عوامی فلاح، سماجی تحفظ و تخفیفِ غربت اتے بنیادی صحت دے منصوبیں تے جائزہ اجلاس تھیا۔اجلاس کوں ہیلتھ کارڈ اتے احساس راشن رعایت پروگرام تے بریفنگ اچ ݙسایا ڳئٖ جو آندے سال جنوری توں مارچ تئیں پنجاب دے سارے گھراݨے کوں 10 لکھ روپے تئیں مفت علاج دیاں سہولتاں ݙتیاں ویسن ، ایندے توں علاوہ اجلاس کوں احساس راشن رعایت پروگرام دے تحت گھٹ آمدن آلے خانداناں کوں ݙتی ونڄݨ آلی سبسڈی تے پیش رفت اتے ایندے توں تخفیفِ غربت دے متوقع مثبت نتائج بارے وی ݙسایا ڳئے۔اجلاس کوں پنجاب دے وݙے شہراں اچ جاری احساس کوئی بھکا نہ سمے، لنگر خانیں تے پناہ گاہواں تے وی ݙسایا ڳئے ، اجلاس کوں ݙسایا ڳئے جو منصوبے ݙیہاڑی دار مزدوراں کیتے خاص طور موسمِ پاسلے اچ ریلیف دا باعث بݨدے پئن ۔اجلاس کوں کامیاب جوان پروگرام، نواں پاکستان ہائوسنگ اتے سپورٹس ڈرائیو تے وی بریفنگ ݙتی ڳئی ۔اجلاس اچ پنجاب اچ بلدیاتی الیکشن دی حکمتِ عملی تے وی ڳال مہاڑ تھئی ۔وزیرِاعظم منصوبیں تے تسلی کریندے ہوئیں جاری عوامی فلاحی منصوبیں کوں معینہ مدت اچ مکمل کرݨ دی ہدایات جاری کیتیاں۔اجلاس اچ وفاقی وزراء شاہ محمود قریشی، ، فواد چوہدری، شفقت محمود، حماد اظہر، مخدوم خسرو بختیار، سینیٹر سیف اللہ نیازی، رکنِ قومی اسمبلی عامر محمود کیانی، وزیرِ اعلی پنجاب سردار عثمان بزدار اتے صوبائی وزیرِ صحت پنجاب ڈاکٹر یاسمین راشد شرکت کیتی۔
