مسلح افواج 6 ستمبر 1965ء کوں غیر معمولی جرأت، بہادری تے جذبۂ ایثار دے نال مادرِ وطن دا دفاع کیتا، نائب وزیرِ اعظم

اسلام آباد۔ 06 ستمبر (اے پی پی) نائب وزیرِ اعظم و وزیرِ خارجہ سینیٹر محمد اسحاق ڈار آکھیا جو اساں آپݨی مسلح افواج دے انہاں بہادر تے جری سپوتاں کوں انتہائی عقیدت تے احترام دے نال خراجِ تحسین پیش کریندوں ڄنہاں 6 ستمبر 1965ء کوں غیر معمولی جرأت، بہادری تے جذبۂ ایثار دے نال مادرِ وطن دا دفاع کیتا، انہاں دی شجاعت، استقامت تے فرض توں بے لوث وابستگی قوم کیتے ہمیشہ باعثِ فخر اتے سرچشمۂ تحریک راہسی، شہیداں تے غازیاں کوں وی خراجِ عقیدت پیش کریندوں، پاکستان دی خدمت اچ انہاں دی بے مثال قربانیاں تے انہاں دے اہل خانہ کوں سلامِ تحسین پیش کریندوں۔ یومِ دفاع و شہدا (6 ستمبر) دے موقع تے وزارتِ خارجہ توں جاری بیان اچ نائب وزیرِ اعظم تے وزیرِ خارجہ سینیٹر محمد اسحاق ڈار آکھیا جو ہک وار ٻیا معرکۂ حق تے آپریشن بُنْیَانٌ مَرْصُوصٌ دے دوران ایں جرأت تے پیشہ ورانہ مہارت دا بھرپور مظاہرہ کیتا ڳیا، عوامِ پاکستان دی غیر متزلزل حمایت دے نال اساݙی مسلح افواج عزم و استقلال دے نال ملک دی خودمختاری تے علاقائی سالمیت دا دفاع تے ہر قسم دی جارحیت دا فیصلہ کن جواب ݙیوݨ کیتے قومی عزم تے مکمل تیاری دا اعادہ کیتا۔ انہاں آکھیا جو اساں دہشت گردی دے خلاف جنگ اچ بالخصوص بلوچستان تے خیبر پختونخوا اچ آپݨی سکیورٹی فورسز تے قانون نافذ کرݨ آلے اداریاں دیاں مسلسل قربانیاں کوں وی قدر و احترام دی نگاہ نال ݙیکھدوں۔انہاں آکھیا جو ایں تاریخی ڈینہہ دے موقع تے، اساں پاکستان دی خودمختاری، علاقائی سالمیت تے قومی مفاداں دے دفاع دے آپݨے غیر متزلزل عزم دا اعادہ کریندوں۔