اسلام آباد۔17دسمبر (اے پی پی):وزیراعظم عمران خان ریگولیٹری اتھارٹیاں دے مؤثر کردار تے زور ݙیندے ہوئیں ہدایت کیتی اے جو مافیاز دے ڳٹھ جوڑ تے نظررکھن ، اپݨے متعلقہ شعبیں اچ خدمات اتے معیار کوں بہتر بݨاون ۔ جمعے کوں وزیراعظم میڈیا آفس توں جاری بیان موجب وزیراعظم عمران خان ریگولیٹری اتھارٹیاں دے سربراہان دے اجلاس دی صدارت کیتی۔ ایں موقع تے وزیراعظم آکھیے جو عوام دے حقوق دے تحفظ کیتے ریگولیٹرز دا کلیدی کردار اے، ریگولیٹرز مؤثر مانیٹرنگ،قانونی اتے ریگولیٹری ضرورتاں کوں سامݨے رکھیندے ہوئیں عوامی مفادات دا تحفظ یقینی بݨاون ۔ وزیراعظم مافیاز دے ڳٹھ جوڑ تے نظر رکھݨ کیتے ریگولیٹری اتھارٹیاں دے مؤثر کردار دی ضرورت تے زور ݙتے ، انہاں سارے ریگولیٹرز کوں ہدایت کیتی اے جو او آپݨا متعلقہ شعبہ اچ شفافیت اتے معیاری خدمات کوں یقینی بݨاون ۔ ریگولیٹری اتھارٹیاں دے سربراہان وزیراعظم کوں یقین ݙیوائے جو او آپݨی متعلقہ اتھارٹیاں دی استعداد کاراچ ودھارا کریسن تاں جو شہریاں کوں بہتر خدمات دی فراہمی یقینی بݨائی ونڄ سڳے۔
