اسلام آباد۔19دسمبر (اے پی پی) وزیراعظم عمران خان افغانستان اچ انسانی صورتحال بارے اسلامی تعاون تنظیم (او آئی سی) دی وزرائے خارجہ کونسل دا غیرمعمولی اجلاس سݙݨ تے سعودی عرب دے کم دی تعریف کریندیں ہوئیں امید کیتی جو دنیا افغانستان کوں کلھا چھوڑݨ دی غلطی ولا کائنا کریسی۔ اے ڳالھیں انہاں سعودی عرب دے وزیر خارجہ شہزادہ فیصل بن فرحان السعود نال ملاقات کریندیں ہوئیں آکھی۔ اتوار کوں وزیراعظم آفس دے میڈیا ونگ توں جاری بیان دے مطابق وزیراعظم عمران خان خادم الحرمین الشریفین شاہ سلمان بن عبدالعزیز السعود اتے ولی عہد شہزادہ محمد بن سلمان کیتے نیک خواہشات دا اظہار کیتا۔ افغانستان دی عوام کیتے فلاح تے بہبود کیتے پاکستان دے عزم دا اعادہ کریندیں ہوئیں انہاں آکھیا جو پاکستان انسانی بنیاداں تے فوری ریلیف کیتے پنج ارب روپے دی امداد ݙتی اے جیڑھی جو 50 ہزار ملین ٹن کنڑک، ہنگامی طبی سہولیات، سردی توں بچݨ کیتے شیلٹرز اتے ٻئی کھاوݨ پیوݨ دی شہیں شامل ہن۔ پاکستان اتے سعودی عرب وچال ݙوپاسہ تعلقات بارے وزیراعظم انہاں تعلقات دی اہمیت کوں اجاگر کیتا۔ او آئی سی دی وزرائے خارجہ کونسل دے غیرمعمولی اجلاس دی میزبانی کرݨ تے وزیراعظم دا شکریہ ادا کریندیں ہوئیں سعودی عرب دے وزیر خارجہ شہزادہ فیصل بن فرحان السعود امید کیتی جو اے اجلاس افغان عوام دی انسانی بنیاداں تے امداد کیتے عالمی برادری کوں متحرک کرݨ دا ذریعہ ٻݨسی۔ انہاں آکھیا جو سعودی عرب پاکستان نال مضبوط تعلقات کوں اہمیت ݙیندے۔
