اسلام آباد۔24دسمبر(اے پی پی)وزیراعظم عمران خان آکھیے جو عام آدمی اتے ڳھٹ آمدن آلے تنخواہ دار طبقے کوں پہلی واری اپنا گھر ٻݨاوݨ دا موقع ݙیندے پئے ہیں، اے ہک تاریخی ویلھا اے، تعمیراتی شعبے دی ترقی نال ساݙی معیشت تکڑی تھیسی اتے تنخواہ دار طبقے دا اپݨے گھر دا خواب پورا تھیسی، بیرون ملک مقیم پاکستانی محنت کر تے پیسہ جمع کریندن جو اپݨا گھر ٻݨا سڳن، ملک اچ اشرافیہ دی سوچ آلیاں ملک دا وݙا ضیان کیتے، اڄ 22 کروڑ دے پاکستان کوں ٻہوں تکڑا ہووݨا چاہیدا ہا۔ اے ڳالھ وزیراعظم عمران خان ”میرا پاکستان، میرا گھر ہائوسنگ قرضہ سکیم” دی تقریب نال خطاب کریندے آکھی اتے انہاں گورنرسٹیٹ بینک اتے چیئرمین نیا پاکستان ہائوسنگ اتھارٹی کوں مابرک ݙتی۔ انہاں آکھیا جو اشرافیہ دی سوچ رکھݨ آلے حکمراناں ملکی ترقی، عوام دی بھلائی اتے اوورسیز پاکستانیاں دی بہتری تے کوئی توجہ نئیں ݙتی، کمزور طبقہ ودھ ھیݨا تھئے اتے طاقتور ٻیا زور آور تھی ڳئے، ودھ صلاحیت دے باوجود پاکستان اڳو تے نئیں ودھ سڳیا، اڄ بنکاں دے نطام دی بہتری پاروں لوکاں کوں سوکھا قرض ݙیوݨ اتے اپݨا گھر ٻݨاوݨ اتے کاروبار کرݨ ڄھیاں سکیماں ݙتن، ہݨ 6 مہینے اچ قرض ملݨ لڳ ڳین، بنک ٻئی مارکیٹنگ کرن اتے اپݨا نظام عام آدمی کیتے سوکھا ٻݨاون، آوݨ آلا ویلھا ہک وݙی تبدیلی دا اے جیندے نال کمزور طبقہ کوں گھر ملسی اتے تعمیراتی شعبہ دے ترقی نال معیشت اڳو تے ودھسی۔ وزیراعظم عمران خان قرض ڳھنݨ آلے لوکاں کوں گھراں دی چابیاں اتے نمایاں کارکردگی دے بنکاں دے چیف ایگزیکٹو افسران کوں اسناد ونݙین۔ تقریب نال مشیر خزانہ شوکت ترین، گورنر سٹیٹ بینک رضا باقر اتے نیا پاکستان ہائوسنگ اتھارٹی دے چیئرمین انور علی حیدر وی خطاب کیتے۔
