اسلام آباد۔22مارچ (اے پی پی) اسلامی تعاون تنظیم (اوآئی سی ) وزرائے خارجہ کونسل اجلاس دا افتتاحی سیشن منگل کوں پارلیمینٹ ہاوس اچ شروع تھیا جئیں دا موضوع اتحاد، انصاف اتے ترقی کیتے سانجھے داری ہئی۔ افتتاحی اجلاس اچ شرکت کیتے رکن ملکاں دے وزرائے خارجہ، غیر ملکی مزمان، مندوبین، اراکین پارلیمنٹ اتے میڈیا دے نمائندے 9 وڄے پجݨ شروع تھی ڳئے ہن۔ وزیر خارجہ مخدوم شاہ محمود قریشی معززین، معزز مزماناں اتے شریک مندوبین کوں خوش آمدید آکھیا۔ وزیراعظم عمران خان 11 وڄ تے 15 منٹ تے قومی اسمبلی دے ہال اچ آئے۔ او آئی سی دے سیکرٹری جنرل حسین براہیم طحہ، چینی وزیر خارجہ وانگ یی، سعودی عرب دے وزیر خارجہ شہزادہ فیصل بن سعود السعود، اسلامی ترقیاتی بینک دے صدر ڈاکٹر محمد سلیمان الجاسر اتے اوآئی سی وزرائے خارجہ کونسل دے 47ویں اجلاس دے چیئرمین نائیجردے حسومی مسعود وی سٹیج تے وزیراعظم دے رلے موجود ہن۔ افتتاحی سیشن داآغاز 11 وڄ تے 18 منٹ تے تلاوت قران پاک توں تھیا جئیں اچ مسلماناں دی صفاں اچ اتحاد اتے قادر مطلق تے پکا یقین رکھݨ دے اللہ تعالیٰ دے احکامات تے روشنی پاتی ڳئی۔ سیشن شروع تھیندیں ای پاکستان دا قومی ترانہ وڄایا ڳیا۔
