اسلام آباد۔26مارچ (اے پی پی):وفاقی وزیر داخلہ شیخ رشید احمد آکھیے جو عدالتی احکامات تے امن وامان دی صورتحال کوں برقرار رکھیا ویسی تے کہیں کوں دھرنے دی اجازت نہ ݙتی ویسی پاکستان تحریک انصاف وزیراعظم عمران خان دی قیادت اچ 27مارچ کوں تاریخی جلسہ کریسی ،عدم اعتماد اچ عدالتی مفرور ووٹ پاوݨ آندے پئن جنہاں دی گرفتاری دا حکم ݙے ݙتے ،دنیا دیاں نظراں پاکستانی سیاست تے ہن تے عمران خان دی مقبولیت ودھ ڳئی اے ،اپوزیشن آلے بوکھلاہٹ اتے گھبراہٹ دا شکار ہن اتے وزیراعظم عمران خان عدم اعتماد اچ سرخرو تھیسن ،او آئی سی کانفرنس دی کامیابی تے سارے اداریں تے منتظمین کوں مبارکباد پیش کرینداں ۔ اے ڳال شیخ رشید احمد ہفتہ کوں اسلام آباد اچ پریس کانفرنس کریندے ہوئیں آکھی اے ۔ وفاقی وزیر داخلہ شیخ رشید احمد آکھیے جو 27مارچ کوں پاکستان تحریک انصاف دا ھک تاریخی جلسہ تھیسی تے راولپنڈی توں ھک وݙی ریلی لال حویلی توں نکلسی کیوں جو راولپنڈی دے عوام وزیراعظم عمران خان اتے وفاداراں دے رلے کھڑے تھیوݨ آلے ہن ۔انہاں آکھیے اساکوں اطلاعات ملن جو اپوزیشن آلے بوکھلائے اتے گھبرا ڳن جیں دی وجہ تون پی ٹی آئی دی ریلی تے جلسے اچ رکاوٹاں پاوݨ دیاں کوششاں کیتیاں ویندیاں پئن جے پاکستان تحریک انصاف دی ریلی اچ رکاوٹاں پاوݨ دی کوششش کیتی ڳئی تاں سخت ایکشن ڳھدا ویسی ۔ شیخ رشید احمد آکھیے جو سپریم کورٹ اتے ہائی کورٹ دے احکامات تے سختی نال عمل کریسوں جیں دے مطابق سرینگر ہائی وےکوں رینجرز دے حوالے کرݙتا ڳئے تاں جوامن وامان دی صورتحال کوں برقرار رکھیا ونڄ سڳے ۔
