پاکستان تاریخ اچ پہلی واری 1046 ارب روپے دے ترقیاتی اخراجات کیتے، ترقیاتی اہداف کامیابی نال حاصل کر ڳِھدن، وفاقی وزیر احسن اقبال

اسلام آباد۔ 10 جولائی (اے پی پی) وفاقی وزیر برائے منصوبہ بندی، ترقی تے اصلاحات پروفیسر احسن اقبال آکھیا جو پاکستان مالی سال 2024-25 دے چھیکڑ تے ملکی تاریخ اچ پہلی واری 1046 ارب روپے دے ریکارڈ ترقیاتی اخراجات کیتے جو ہک تاریخی سنگ میل اے، سخت مالی حالات دے باوجود وفاقی حکومت ترقیاتی اہداف کامیابی نال حاصل کیتے، ترقیاتی بجٹ دا 96 فیصد حصہ مؤثر طریقے نال خرچ کیتا ڳئے جو شفافیت، کارکردگی اَتے منصوبہ بندی دی کامیابی دا ثبوت ہے۔ اے ڳالھیں خمیس کوں انہاں ماہانہ ترقیاتی رپورٹ تے میڈیا کوں بریفنگ ݙیندیں ہوئیں کیتا۔ احسن اقبال وزارت منصوبہ بندی دی ٹیم کوں بجٹ دے بروقت اَتے شفاف استعمال کوں یقینی بݨاوݨ دی تعریف کریندیں ہوئیں آکھیا جو اگر ترقیاتی اخراجات وقت تے نہ ہوندے تاں آوݨ آلے مالی سال دا بجٹ متاثر تھی سڳدا ہا، ایں کارکردگی دی بدولت آوݨ آلے ترقیاتی منصوبے بروقت شروع کیتے ونڄ سڳسن۔وفاقی وزیر ݙسایا جو پچھلے سال 700 ارب روپے تئیں محدود رہݨ آلا پی ایس ڈی پی ہݨ ݙو واری ترقی دی راہ تے گامزن تھی ڳئے، بلوچستان دے منصوبیاں کوں اوّلین ترجیح ݙیندے ہوئیں 210 ارب روپے 147 منصوبیاں کیتے مختص کیتے ڳئن۔ انہاں اچ انفراسٹرکچر منصوبے شامل ہن جو بلوچستان دی معیشت کوں متحرک کرݨ اَتے روزگار دے نویں موقع پیدا کرݨ وچ مددگار ثابت تھیسن۔انہاں آکھیا جو “اڑان پاکستان انٹرنیشنل انٹرن شپ پروگرام” دے تحت دنیا دیاں ممتاز یونیورسٹیاں نال تعلق رکھݨ آلے 31 اوورسیز پاکستانی طالب علماں پاکستان آ تے 6 ہفتیاں تے مشتمل انٹرن شپ دا آغاز کیتے، اِے نوجوان وطن دی ترقی اچ آپݨا کردار ادا کریسن۔ پروگرام کیتے 2300 درخواستاں وصول تھئیاں، جنہاں اچوں میرٹ تے 31 طالب علماں دا انتخاب کیتا ڳیا۔