تحریک عدم اعتماد گھن آوݨ آلیں لوکاں دے ضمیر کوں مل گھنݨ دی کوشش کیتی ، سارے چوراں کوں چیلنج اے جو اوکٹھے تھی تے جلسہ کر تے ݙکھاون تاں جو لوک وی انہاں دے جلسے دا موازنہ کرسڳن ، وفاقی وزیر اطلاعات چوہدری فواد حسین

اسلام آباد۔26مارچ (اے پی پی):وفاقی وزیر اطلاعات و نشریات چوہدری فواد حسین آکھیے جو تحریک عدم اعتماد گھن آوݨ آلیں چوری لکیے رشوت دے پیسے استعمال کر تے لوکاں دے ضمیر کوں مل گھنݨ دی کوشش کیتی اے ، پاکستان دے عوام کل ایں سازش کوں مسترد کرݙیسن ، انشاء اللہ اڄ پاکستان دی تاریخ دا ساریں توں وݙا جلسہ ہوسی جیں اچ 10 لکھ توں ودھ لوک عمران خان کوں خراج تحسین پیش کریسن جنہاں ملکی معیشت کوں آپݨے پیراں تے کھڑا کیتے تے ملک کوں ھک آزاد خارجہ پالیسی ݙتی ، جلسے کرݨ ساریاں جماعتاں دا حق اے، سارے چوراں کوں چیلنج اے جو او کٹھے تھی تے جلسہ کر ݙکھاون تاں جو لوک موازنہ کر سڳن۔ اے ڳالھ انہاں ہفتے کوں بنی گالہ اچ میڈیا نال ڳالھ مہاڑ کریندے ہوئیں آکھی اے ، ایں موقع تے گورنر سندھ عمران اسماعیل اتے پی ٹی آئی دے رہنما عامر کیانی وی موجود ہن ۔ وفاقی وزیر اطلاعات آکھیے جو لکھاں لوکاں دا سمندر اسلام آباد دے پاسے آندا پئے گلگت بلتستان توں 20 کلو میٹر لمبی ریلی اسلام آباد پڄدی پئی اے ، انہاں آکھیے جو گلگت بلتستان دے لوک ایندے توں پہلے پاکستان دی سیاست اچ اتنے متحرک نہ ہن جتنے ہݨ ہن ۔ خیبر پختونخوا، پنجاب، کراچی، بلوچستان سودھے پورا ملک تحریک انصاف دے رنگاں اچ رنگ ڳئے ۔ انہاں آکھیے جو کل ݙاہ لکھ توں ودھ لوک وزیراعظم عمران خان دے رلے یکجہتی دا اظہار کریسن ۔