مسلح افواج کوں سیاست اچ نہ ڳھیلیا ونڄے، ملکی مفاد کیتے فوج کوں سیاست بازی توں پرین رکھیا ونڄے، آئی ایس پی آر

راولپنڈی۔8مئی(اے پی پی)پاک فوج دے شعبہ تعلقات عامہ (آئی ایس پی آر) آکھیے جو ایں ویلھے ملک اچ جاری سیاسی ڳالھ مہار اچ ڄاݨ تے ان ڄاݨ پاکستان دی مسلح افواج اتے اوندی قیادت کوں ملوث کرݨ دی کوشش کیتی ڳئی اے، اے کوششاں مسلح افواج دے نال نال انہاں دی اعلیٰ قیادت بارے ہین، اے کوششاں براہ راست یا بلواسطہ عوامی فورمز اتے سوشل میڈیا سودھا مختلف حوالیاں تے کیتاں ڳین۔ آئی ایس پی آر آکھیے جو سیاسی رہنما، صحافی اتے تجزیہ کاراں ولوں غیر مصدقہ، ہتک آمیز اتے اشتعال انگیز بیانات دا اے سلسلہ ٻہوں نقصان دہ اے۔ بیان اچ توقع کیتی ڳئی اے جو سارے فریق قانون دی پاس داری کریسن اتے مسلح افواج کوں ملک دے بہترین مفاد کیتے سیاسی گالھ مہار توں پرے رکھیسن۔