اسلام آباد۔15جون (اے پی پی) وزیر خارجہ بلاول بھٹو زرداری بھارت دی حکمران جماعت بی جے پی دے عہدیداراں دے تضحیک آمیز ریمارکس تے بھارت اچ ودھدے اسلامو فوبیا دے حوالے ںال اقوام متحدہ دے سیکرٹری جنرل انتونیو گوتریس نال ٹیلی فون تے ڳالھ مہاڑ کیتی ۔ دفتر خارجہ دے ترجمان دی طرفوں جاری بیان موجب وزیر خارجہ بلاول بھٹو زرداری اقوام متحدہ دے سیکرٹری جنرل کوں بھارت اچ جاری اسلاموفوبک اقدامات خاص طور تے ہݨے ہی حضور نبی اکرم صلی اللہ علیہ وآلہ وسلم بارے بی جے پی دے ݙو سینئرعہدیداراں دی طرفوں توہین آمیز ریمارکس بارے ݙسایا ۔ وزیر خارجہ ایں ڳالھ تے زور ݙتے جو ایں طرح ڄاݨ ٻجھ تے کیتی ڳئی اشتعال انگیزی توں پوری دنیا دے ارباں مسلماناں دے جذبیں کوں ݙکھ تھئے۔ انہاں سیکرٹری جنرل تے زور ݙتےجو بھارت اچ نفرت انگیز تقاریر تےاسلامو فوبیا دی ودھدی لہر اتے انہاں مکروہ ریمارکس دا نوٹس گھنن۔ انہاں بھارتی حکام دی طرفوں پرامن مظاہرین دے نال روا رکھیے ونڄݨ آلے ناروا سلوک دی وی مذمت کیتی جیں اچ مظاہرین دے گھراں کوݨں غیر قانونی طورتے بلڈوز کرݨ وی شامل اے جیڑھا جو مسلماناں تے بی جے پی اتے آر ایس ایس دے اتحاد دی طرفوں مسلسل ظلم و ستم دا تازہ اقدام اے۔ وزیر خارجہ آکھیے جوج بی جے پی عہدیداراں دے توہین آمیز ریمارکس دی بین الاقوامی مذمت دے باوجود بی جے پی دی اعلیٰ قیادت تے بھارتی حکومت دی طرفوں واضح طور تے ایندی مذمت نہ کرݨ ٻہوں مایوس کن اے۔
