اسلام آباد۔2اگست (اے پی پی) بھارت دے غیر قانونی زیر تسلط جموں تے کشمیر تے غاصبانہ تسلط: تاریخ دا سیاہ باب اتے مہذب قوماں، عالمی امن اتے انسانی حقوق دے دعویداراں دے منہ تے بدنما داغ اے جڈانجو عالمی طاقتاں اتے بااثر ملکاں دے دہرے کردار بھارت کیتے جموں تے کشمیر اچ انسانی حقوق دی سنگین پامالیاں اتے بے بے بناہ شہریاں تے ظلم کرݨ دا رستہ ہموار کیتے۔ بھارتی قابض افواج جموں تے کشمیر اچ حق خود ارادیت کیتے جدوجہد نینگراں دا ماورائے عدالت قتل، شہریاں دی گرفتاری، تشدد، تریمتیں دی آبروریزی، شیر خوار ٻالاں کوں پلیٹ گناں نال شہید کرݨ معمول ٻݨا ڳھدے۔ بھارت کوں اقوام متحدہ دی قرارداداں دی پاسداری کرݨ تے مجبور کرݨ دی بجائے، بین الاقوامی برادری دی چُپ بھارت کوں آئین دے آرٹیکل 370 اتے 35A کوں منسوخ کرتے کشمیریاں کوں محکوم ٻݨاوݨ دے آپݨے ایجنڈے کوں اڳوں ودھاوݨ دی ترغیب ݙتی اے۔ بھارت دی حکمران بھارتیہ جنتا پارٹی (بی جے پی) آرٹیکل 370 کوں منسوخ کر تے جموں تے کشمیر دے لوکاں دی شہریت ، جائیداد دی ملکیت، اتے رہائش دے بنیادی حقوق دے خصوصی حق کوں غصب کر ڳھدے۔ ایں قانون دے تحت بھارتی شہری جموں تے کشمیر اچ جائیداد نی ڳھن سڳدے ہن اتے بھارت دی مرکزی حکومت کنے خطے اچ مالیاتی ایمرجنسی دا اعلان کرݨ دا کوئی اختیار کائنا ہئی۔ بی جے پی آرٹیکل 35A کوں وی منسوخ کر ݙتے جئیں مقبوضہ کشمیر دی مقننہ کوں اے فیصلہ کرݨ دا پورا صوابدیدی اختیار ݙے رکھیا ہئی جو کون ریاست دا مستقل رہائشی تھی سڳدے۔ اکتوبر 1947 آچ کشمیر تے قبضے دے بعد بھارت ولوں ایجھی کاروائیاں دی طویل اتے خوفناک تاریخ اے۔ مہاراجہ ہری سنگھ نام نہاد الحاق تے دستخط کیتے جئیں دے بعد بھارت خارجہ، دفاع اتے مواصلات بھارتی حکومت کوں منتقل کرݨ تے رضامندی ظاہر کیتی۔ شیخ عبداللہ وزیر اعظم دے طور تے تقرری دے بعد بھارتی حکومت نال جموں تے کشمیر دی خصوصی حیثیت تے ڳالھ مہاڑ کیتی جئیں دے نتیجے اچ 1954 اچ آرٹیکل 370 اتے اوندے بعد آرٹیکل 35A کوں بھارتی آئین اچ شامل کیتا ڳیا۔ تقسیم برصغیر دے فارمولے دے تحت ہندو اکثریتی علاقے بھارت اتے مسلم اکثریت علاقے پاکستان نال رلݨے ہن پر مہاراجہ ہری سنگھ کشمیری عوام دی مرضی دے خلاف بھارت نال الحاق کرݨ دا فیصلہ کیتا مقامی آبادی کوں آپݨے فیصلے دے خلاف کھڑا تھیوݨ تے مجبور کیتا جئیں پاروں بھارت اتے پاکستان وچال جنگی صورتحال بݨ ڳئی اتے اوں ویلھے دے بھارتی وزیر اعظم جواہر لال نہرو تنازعہ کشمیر اقوام متحدہ اچ ڳھن ڳئے جتھاں کشمیریاں کوں حق خودارادیت کیتے قرارداداں منظور کیتی ڳئی۔ اے جواہر لال نہرو دے بیان تھی پالیسی ہئی جو اگر کہیں علاقے اچ کوئی تنازعہ ہووے تاں اوندا فیصلہ رائے شماری نال کیتا ونڄے۔ کشمیر بارے نہ تاں نہرو اتے نہ بئے بھارتی لیڈراں ایں اصول دا احترام کیتا اتے نہ کشمیر اچ رائے شماری کراوݨ توں ہمیشہ گریز کیتا۔ پاکستان ہمیشہ کشمیر دے تنازعے دے پر امن حض کیتے کوشش کریندا پئے، ݙوہیں ملکاں وچال کئی واری مذاکرات وی تھین پر جئیں ویلھے ڳالھ اڳوں نہ ودھی تاں بھارتی فوج ولوں لائن آف کنٹرول تے بلااشتعال گولہ باری یا پاکستان اندر سازشاں کیتی ڳئی۔ لائن آف کنٹرول تے 2003 اچ جنگ بندی دا معاہدہ طے تھیا جئیں پاروں کجھ عرصے کیتے لائن آف کنٹرول تے عارضی طور تے کشیدگی ڳھٹ تھی ڳی ہئی۔ 2005 اچ سری نگر اتے مظفر آباد وچال بس سروس شروع تھئی اتے خطے اچ زلزلے دے بعد ݙوہیں پاسوں تجارت کیتے رستے دی نشاندہی کریندیں ہوئیں کنٹرول لائن دے آر پار سامان دی نقل و حمل دی موکل ݙتی ڳئی۔ بھارت اچ 2014 دے انتخابات آچ بھارتیہ جنتا پارٹی دی کامیابی دے بعد صورتحال وگڑ ڳئی اتے بی جے پی ہندوتوا ایجنڈا تے عمل شروع کیتا جݙانجو بھارت غیر قانونی زیرتسلط جموں تے کشمیر اچ کشمیری رہنماواں اتے تحریک آزادی دے کارکناں کوں گرفتار کیتا ڳیا۔ 2016 آچ نوجوان کشمیری رہنماءبرہان وانی دی شہادت تحریک آزادی کوں تقویت ݙتی۔ اڄوکے سالیں اچ بی جے پی اتے بھارتی فوج کشمیریاں دے خلاف وݙے پیمانے تے آپریشن اتے ریاستی دہشت گردی شروع کر رکھی اے۔ ایندی تازہ مثال 2019 اچ کنٹرول لائن دے پار پاکستان دی فضائی حدود اچ بھارتی لڑاکا طیاریاں دی دراندازی ہئی۔ فروری 2019 اچ بھارت دی ایں فضائی مہم اچ پاکستان بھارتی فضائیہ دے ݙو لڑاکا طیاریاں کوں ماریا اتے اوندے ونگ کمانڈر ابھی نندن کوں گرفتار کیتا جئیں دے بعد پاکستان جذبہ خیر سگالی دے طور چھوڑ ݙتا ہئی۔ ایں واقعے دے کجھ عرصے بعد بی جے پی ہک واری ولا بھارت دے عام انتخابات اچ کامیابی حاصل کیتی اتے این وار اوں سارے سفارتی اتے جمہوری اصولاں کوں پچھوں رکھ تے انہاں آئینی دفعات کوں منسوخ کر ݙتا جئیں مقبوضہ کشمیر کوں خصوصی حیثیت ݙتی ہئی۔
