متاثرین سیلاب دی بحالی و تعمیرنو سانڳے ودھ وسائل دی لوڑھ پوسی، وزیراعظم محمد شہباز شریف دی امریکی وفد نال ڳالھ مہاڑ

اسلام آباد۔5ستمبر(اے پی پی)وزیراعظم محمد شہباز شریف آکھیے جو حکومت سیلاب متاثرین دے بچائو اتے ریلیف اچ ردھی ہوئی اے، متاثرین سیلاب دی بحالی و تعمیرنو سانڳے ودھ وسائل دی لوڑھ پوسی، پاک امریکا تعلقات اچ ربط اتے باہمی احترام دے ڳانݙھے ودھاوݨ دی لوڑھ اے۔ اے ڳالھ انہاں اسلام آباد اچ پاکستان دے دورہ تے آئے کانگریس وومن شیلا جیکسن لی دی اڳواݨی اچ امریکی وفد نال ملݨ ویلھے آکھی۔ وفد اچ کانگریس مین تھامس سوزی اتے آل گرین وی ہن۔ وزیر اعطم دورہ پاکستان دا خیر مقدم کریندے آکھیے جو سیلاب نال پاکستان اچ 3 کروڑ 30 لکھ توں ودھ لوک متاثر تھین، 13 سو توں ودھ لوک موئن اتے زراعت، لائیو سٹاک، املاک و انفراسٹرکچر دا نقصان ایں توں وی وݙا اے، متاثرین دی امداد اتے بحالی دے چیلنج نال نبݨݨ کیتے بین الاقوامی برادری کوں ہتھ ونݙاوݨا ہوسی، وزیراعظم آکھیا جو پاکستان کاربن دے سب توں ڳھٹ اخراج آلے ملکاں اچ ہووݨ دے باوجود موسمیاتی تبدیلیاں دا شکار اے۔