عمران خان قوم کوں جواب ݙیون جو عثمان بزدار ،محمود خان، مرادسعید اتے شہریار آفریدی دی تقرری کیتے میرٹ داکیڑھا معیار مقرر کیتا ڳیا ہئی ، وفاقی وزیر خزانہ مفتاح اسماعیل

اسلام آباد۔7ستمبر (اے پی پی):وفاقی وزیر خزانہ ومحصولات مفتاح اسماعیل آکھیے جو عمران خان قوم کوں جواب ݙیون جو عثمان بزدار ،محمود خان، مرادسعید اتے شہریار آفریدی دی تقرری کیتے میرٹ داکیڑھا معیار مقرر کیتا ڳیا ہئی ، فرح خان اتے خاور مانیکا دی کرپشن دا کیا عمران خان کوں علم کائناں ہئی، ھک پاسے امریکا دے خلاف مہم چلائی ڳئی ݙوجھے پاسے امریکا دی حمایت حاصل کرݨ کیتے 55 لکھ روپے مہینہ دے عوض لابنگ فرم دی خدمات حاصل کیتیاں ڳئن ، اے دوغلہ پن اے، مہانگی بجلی پی ٹی آئی دا تحفہ اے، اکتوبر توں مہانگ تے بجلی دیاں قیمتاں گھٹ تھیسن ، ٻدھ کوں اتھاں وزیردفاع خواجہ محمدآصف دے رلے پریس کانفرنس کریندے ہوئیں وزیرخزانہ مفتاح اسماعیل آکھیے جو عمران خان ہمیشہ توں میرٹ دی ڳالھ کریندن، اوجواب ݙیون جو عثمان بزدارداتقررمیرٹ تے تھئے ، محمودخان کوں میرٹ تے وزیراعلیٰ بݨائے ، مرادسعید دی تقرری میرٹ تے تھئی اے ، کیا شہریارآفریدی کوں میرٹ تے وزیربݨایا ڳیا ، فرح خان ڈپٹی کمشنرز دے تبادلے میرٹ تے کریندیاں ہن ، کیا عمران خان کوں ایجنسیاں فرح گوگی دی کرپشن بارے نی ݙسایا ،عمران خان نہ چاہندے تاں فرح خان کرپشن تے ٹرانسفروپوسٹنگ کرسڳدی ہئی ، عمران خان کوں انہاں سوالاں دا ہاں یا ناں اچ جواب ݙیوݨا ہوسی ۔ وزیرخزانہ آکھیےاے وی سوال اٹھدے جو خاورمانیکا اتے انہاں دے صاحبزادے کیڑھی حیثیت اچ اسسٹنٹ کمشنرز اتے ڈپٹی کمشنرزدے ٹرانسفرکرویندے ہن ، کیڑھے ڈی پی او دے تبادلے کیتے وزیراعظم آفس توں فون آندے رہیے ، وزیرخزانہ آکھیے جو لاہور اچ 27 ارب روپے دی لاگت نال 29کلومیٹرمیٹرو مکمل تھی ڳئی لیکن ایں دے برعکس پشاوراچ بی آر ٹی105 ارب دی لاگت اچ بݨی ۔ جے بی آرٹی اچ کرپشن نی تھئی تاں کرپشن دی تحقیقات روکݨ کیتے ہائی کورٹ اتے سپریم کورٹ نال کیوں رابطہ کیتا ڳئے ۔ وزیرخزانہ آکھیے جو عثمان بزدار سیمنٹ دے 16 لائسنس جاری کیتے ہن ، ماحولیاتی حوالے نال ایویں نہ کرسڳدے ہن اے سارے لائسنس ویچے ڳن تے رشوت دے پیسے نمل کوں وی ݙتے ڳئن ، کیاعمران خان کوں ایندا پتہ کائناں ہئی ؟