پورے ملک اچ اڄ یوم بحریہ ملی جوش وجذبے نال منایا ڳئے ، ترجمان پاک بحریہ

اسلام آباد۔8ستمبر (اے پی پی)پورے ملک اچ یوم بحریہ اڄ ملی جوش وجذبے دے نال منایا ڳئے ،8ستمبر 1965 کوں پاک بحریہ دی لازوال قربانیاں دی یاد اچ منایا ویندے ۔ ترجمان پاک بحریہ موجب 8 ستمبر یوم بحریہ ملکی تاریخ دا عظیم الشان اتے یاد گارݙینھ اے ، جݙاں 1965 دی جنگ دے دوران پاک بحریہ دے سرفروشاں آپݨیاں قربانیاں، لازوال جذبے تے غیر معمولی کارنامیں توں دشمن دے ناپاک عزائم کوں خاک اچ رلا ݙتا ۔7 اتے 8 ستمبر1965 دی رات پاک بحریہ دے ست جنگی جہازاں تے مشتمل بحری ٻیڑے” آپریشن سومنات‘‘ دے دوران بھارت دی بندرگاہ دوارکا تے بمباری کیتی۔ایں مستعد اتےزیرک آپریشن اہم ساحلی تنصیبات بشمول بھارتی ریڈار سٹیشن اتے ریڈیو بیکن کوں تباہ کیتا جیڑھا جو کراچی تے حملے کیتے بھارتی فضائیہ دے جہازاں کوں رہنمائی ݙیندا پیا ہئی ۔یوم بحریہ پاکستان نیوی دی واحد آبدوز غازی دے تاریخی کارنامیں دی یاد اچ وی منایا ویندے ، جیں 1965 دی جنگ دے دوران اپݨی بالادستی قائم رکھی، بھارتی بندرگاہ دے قرب و جوار اچ ایندی موجود گی نہ صرف بھارتی بحری جہازاں بشمول طیارہ برادر جہاز کوں انہاں ہی دی بندرگاہ اچ مقید رکھیا بلکہ او شمالی بحیرہ عرب آلے پاسے ونڄݨ توں وی ݙردے رہیے ۔8 ستمبر دا ݙینھ پاکستان دی بحری تاریخ اچ سنہری باب دے طور تے رقم اے اتے آوݨ آلیاں نسلاں کیتے باعث فخر و ترغیب اے۔