سیلاب نال نبݨݨ کیتے پاکستان دی فوری تے وسیع پیمانے تے مالی مدد دی لوڑھ اے، سیکرٹری جنرل اقوام متحدہ

اقوام متحدہ۔12ستمبر (اے پی پی):اقوام متحدہ دے سیکرٹری جنرل انتونیو گوتیرس سیلاب نال نبݨݨ اچ قومی اتے علاقائی سطح تے پاکستان دی فوج تے حکومت دی وسیع پیمانے تے کیتیاں ونڄݨ آلیاں کوششاں تے خراج تحسین پیش کریندے ہوئیں پاکستان کیتے وختی تے وݙے پیمانے تے مالی مدد کرݨ تے زور ݙتا تے آکھیے جو پاکستان اچ سیلاب توں متاثرہ علاقہ میݙے ملک پرتگال دے کل رقبے توں وی ترائے گنا زیادہ اے ۔ دورہ پاکستان دے چھیکڑ تے کراچی اچ صحافیاں نال ڳالھ مہاڑ کریندے ہوئیں آکھیے جو انہاں دنیا اچ کئی انسانی المیے ݙٹھن لیکن ماحولیاتی تبدیلی پاروں ایں قدر وݙے پیمانے تے تبدیلی پہلی واری ݙٹھی اے تے اینکوں بیان کرݨ کیتے انہاں کنے الفاظ کائنی ، انہاں آکھیے جو انہاں کوں سیلاب متاثرین دی بے پناہ مشکلات و مصائب تے افسوس اے ایں دے نال نال انہاں امدادی کارکناں تے عام آدمی دی اوکھے ویلھے آپݨے بھیݨ بھراواں دی مدد ، انسانی ہمدردی دی بنیاد تے وݙے پیمانے تے امداد دی فراہمی اتے ہیروازم دی شاندار مثالاں وی ݙٹھن ، انہاں سیلاب نال نبݨݨ کیتے قومی اتے علاقائی سطح تے پاکستان دی فوج تے حکومت دی وسیع پیمانے تے کیتیاں ونڄݨ آلیاں امدادی کوششاں تے خراج تحسین پیش کیتے ۔ انہاں متاثرہ علاقیں اچ اوکھے ویلھے سول سوسائٹی، انسانی تنظیماں تے اقوام متحدہ دے اہلکاراں تے ڈونرز دی طرفوں انسانی ہمدردی دی بنیاد تے پاکستان دی مدد کرݨ تے انہاں دا شکریہ ادا کیتے۔ سیکرٹری جنرل آکھیے جو ضرورتاں ٻہوں زیادہ ہن ایہا وجہ اے جو پاکستان کیتے وختی تے وݙے پیمانے تے مالی مدد دی لوڑھ اے تے اے صرف یکجہتی اتے فراخدلی دا مظاہرہ کرݨ بلکہ انصاف دا وی سوال اے۔ پاکستان دے وزیر خارجہ بلاول بھٹو دورہ پاکستان تے اقوام متحدہ دے سیکرٹری جنرل دا شکریہ ادا کریندے ہوئیں آکھیے جو انہاں اوکھے ویلھے پاکستان دا دورہ کیتے تے کئی مہینے توں جاری ساوݨ دے مینھ پاروں وݙے پیمانے تے تھیوݨ آلیاں تباہ کاریاں ݙٹھن، انہاں ایں ڳالھ تے زور ݙتے جو ماحولیاتی بحران پاکستان دا پیدا کردہ کائنی ایں کیتے ایں بحران نال نبݨݨ کیتے عالمی اقدامات دی لوڑھ اے ، واضح رہے جو اقوام متحدہ سیلاب دی تباہ کاریاں نال نبݨݨ اچ پاکستان دی مدد کیتے پہلے ہی 160ملین ڈالر دی فلیش اپیل کیتی ہوئی اے ۔