نقلی ،غیر رجسٹرڈ دوائیں ویچݨ آلیں دے خلاف ڈریپ ایکٹ دے تحت کاروائی کیتی ویندی پئی اے ،وفاقی وزیر صحت

اسلام آباد۔14ستمبر (اے پی پی):وفاقی وزیر صحت عبدالقادرپٹیل آکھیے جو پورے ملک توں نقلی ،غیر رجسٹرڈ اتے غیر معیاری دوائیں ویچݨ آلیں دے خلاف ڈریپ ایکٹ دے تحت کاروائی کیتی ویندی پئی اے ۔ حکومت دی مقررہ قیمتاں توں ودھ تے دوائیں ویچݨ آلیں دے خلاف قانونی کارروائی کیتی ویسی ، آپݨے ھک بیان اچ انہاں آکھیے جو عوام نال زیادتی برداشت نہ کیتی ویسی ، جیڑھے غیر قانونی کماں اچ ملوث پاتے ڳئے انہاں دے خلاف اوکھے ہتھاں نال نبݨیا ویسی ، انہاں آکھیے شعبہ صحت دی کارکردگی کوں بہتربݨاوݨ کیتے کوشاں ہیسے تے ایں سلسلے اچ وݙے پیمانے تے اصلاحات کیتیاں ویندیاں پئن ۔وزیرصحت دی ہدایت تے دوائیں دیاں ودھ قیمتاں دے خلاف پورے ملک اچ کریک ڈاؤن جاری اے۔پیناڈول دی ذخیرہ اندوزی دے خلاف ڈریپ وݙی کارروائی کیتی۔ ایں حوالے نال وزارت صحت دے حکام آکھیے جو ڈریپ دی ٹیم کراچی کچی ڳلی میڈیسن مارکیٹ اچ الطاف ٹریڈرزتے چھاپے دے دوران تقریباً 2لکھ 52 ہزار پیناڈول دیاں گولیاں برآمد کیتن۔