وزیراعظم دا سیلاب توں متاثرہ علاقیں دے 22 لکھ گھریلو، ساڈھے 3 لکھ کمرشل صارفین دے بجلی دے اگست تے ستمبردے ٻل معاف کرݨ دا اعلان

صحبت پور۔14ستمبر (اے پی پی):وزیراعظم محمد شہباز شریف سیلاب توں متاثرہ علاقیں دے 22 لکھ گھریلو تے ساڈھے 3 لکھ کمرشل صارفین دے بجلی دے اگست دے مہینے تے ستمبردے ٻل معاف کرݨ دا اعلان کریندے ہوئیں آکھیے جو اساں ملک کوں ڈیفالٹ توں بچاݨ کیتے اوکھے فیصلے کرتے سیاست دی بجائے اساں ریاست بچائی،300 یونٹ تئیں بجلی دے ݙو کروڑ10 لکھ صارفین کوں ستمبر اچ وی فیول پرائس ایڈجسٹمنٹ دی چھوٹ ݙیسوں ۔ صحبت پور بلوچستان اچ میڈیا نال ڳالھ مہاڑ کریندے ہوئیں وزیراعظم آکھیے جو سیلاب توں صوبہ سندھ تے بلوچستان اچ وݙے پیمانے تے تباہی تھئی، وفاقی حکومت دی طرفوں سیلاب متاثرین کیتے 70 ارب روپے نقد رقم دی صورت اچ تقسیم کیتے ویندے پئن ، ہݨ تئیں 24 ارب روپے تقسیم تھی چکئن ، بے نظیر انکم سپورٹ پروگرام دے تحت 25 ہزار روپے فی گھراݨہ ݙتے ویندے پئن ، کجھ علاقیں اچ انٹرنیٹ اتے بجلی دا نظام درہم برہم تھیوݨ توں ایں رقم دی تقسیم اچ تعطل اے او وی وختی دور کریسوں ، انہاں آکھیے جو متاثرہ علاقیں دے ہونہار ٻالاں دا تعلیمی خرچ نہ تھیوݨ ݙیسوں ۔ وزیراعظم آکھیے جو سیلاب دیاں تباہ کاریاں ایں قدر شدید ہن جو ہر اکھ اچ ہنجوں ہن تے پوری قوم رل تے ایندا مقابلہ کریندی پئی اے ۔ وزیراعظم آکھیے جو حکومت ٻہوں اوکھی صورتحال تے ورثہ اچ ملݨ آلیاں معاشی مشکلات دے باوجود اوکھے فیصلے کرتے پاکستان کوں ڈیفالٹ تھیوݨ توں بچائے ، سیاست بعد اچ تھیندی رہسی اساں ریاست بچائی۔ انہاں آکھیے جو وفاقی تے صوبائی حکومتاں، قومی و صوبائی ادارے، انتظامیہ سارے رل تے سیلاب توں متاثرہ علاقیں اچ کم کریندے پئن ایندی تباہی ٻہوں زیادہ اے تاں جو انسانی حد تئیں جیں قدر ممکن اے متاثرین دی مدد کریسوں ، این ڈی ایم اے پاݨی دے ٹینک ݙیوݨ کیتے اقدامات کیتن تاں جو متاثرین کوں منرل واٹر دی فراہمی یقینی بݨائی ویسی جیں دے ݙو ٹرک اڄ جݙاں جو 10 ٹرک آندے ݙو ݙینھ اچ پڄ ویسن ۔وزیراعظم ایں موقع تے ضلع صحبت پور اچ فلڈ ریلیف کیمپ دا دورہ کیتے جݙاں جو اتھاں قائم سکول وی ڳئے ۔