وزیراعظم شہباز شریف توں متاثر صحبت پور اچ ݙو مہینے اچ جدید ماڈل سکول ٻݨاوݨ دا اعلان

صحبت پور۔14ستمبر (اے پی پی) وزیراعظم محمد شہباز شریف بلوچستان دے سیلاب توں متاثرہ علاقے صحبت پور اچ ݙو مہینے اچ جدید ماڈل سکول ٻݨاوݨ دا اعلان کریندیں ہوئیں آکھیا جو ایں سکول اچ پڑھݨ آلے طلباء تے طالبات کوں ساری جدید سہولتاں ملسن۔ انہاں کوں ٹیبلٹ ݙتے ویسن۔ ایندا سارا خرچہ وفاقی حکومت برداشت کریسی۔ اے اساݙا فخر ٻݨسن۔ بدھ کوں چھل توں متاثرہ علاقے صحبت پور دے دورہ دے موقع تے وزیراعظم شہباز شریف کیمپ اچ ٻݨیے سکول دے ٻالاں اچ گھل مل ڳئے۔ وزیراعظم ٻالاں توں قومی ترانہ وی سݨٰیا۔ وزیراعظم ٻالاں کوں شاباش ݙیندیں ہوئیں آکھیا جو او محنت نال تعلیم حاصل کرن۔ پاݨی لہݨ دے بعد انہاں کوں جلدی آپݨے گھراں اچ آباد کیتا ویسی۔ انہاں دے والدین کوں فصلاں دے تھیوݨ آلے نقصان دا وی معاوضہ ݙیسوں۔ متاثرہ ٹٻراں کوں پنجوی ہزار روپے فی ٹٻر نقد رقم ݙتی ویندی پئی اے۔ متاثرہ علاقیاں اچ چنگے سکول اتے ہسپتال ٻݨیسوں۔ متاثرین کوں کلھا نہ چھڑیسوں۔ وفاقی اتے صوبائی حکومتاں سارے اداریاں نال رل تے مدد کریسن۔ انہاں آکھیا جو متاثرہ علاقیاں توں پاݨی کݙھݨ کیتے حکام کوں خصوصی ہدایت کر ݙتی ڳئی اے۔ ایں موقع تے پروزیراعظم محمد شہباز شریف متاثرین کیتے ٻݨیے کیمپ اچ طبی سہولتاں دا وی جائزہ ڳھدا۔